„რუსეთის ომი უკრაინის და თავისუფალი ევროპის წინააღმდეგ დაიწყო ყირიმით და უნდა დასრულდეს ყირიმის გათავისუფლებით,“ – განაცხადა უკრაინის პრეზიდენტმა, ვოლოდიმირ ზელენსკიმ წუხელ, 9 აგვისტოს, საღამოს ტრადიციულ მიმართვაში.
მან აღნიშნა, რომ დღეს შეუძლებელია თქმა, ზუსტად როდის მოხდება ეს, თუმცა, მისივე თქმით, უკრაინა მუდმივად ამატებს აუცილებელ კომპონენტებს „ყირიმის გათავისუფლების ფორმულას“.
მან ხაზი გაუსვა ყირიმის გათავისუფლების საკითხს გლობალური უსაფრთხოების თვალსაზრისით:
„რუსი ოკუპანტების ყირიმში ყოფნა საფრთხეს უქმნის მთელ ევროპასა და გლობალურ სტაბილურობას. შავი ზღვის რეგიონი არ შეიძლება იყოს უსაფრთხო, სანამ ყირიმი ოკუპირებულია.
რუსებმა ჩვენი ნახევარკუნძული, რომელიც ყოველთვის იყო ევროპის ერთ-ერთი საუკეთესო ადგილი, აქციეს ევროპის ერთ-ერთ ყველაზე საშიშ ადგილად. რუსეთმა ყირიმში მოიტანა მასშტაბური რეპრესიები და ეკოლოგიური პრობლემები,“ – განაცხადა ზელენსკიმ.
ზელენსკიმ ეს განცხადება გააკეთა რუსეთის მიერ ოკუპირებულ ყირიმში სამხედრო აეროდრომზე მომხდარი ძლიერი აფეთქებიდან რამდენიმე საათში. სწორედ აქ მდებარეობს სამხედრო აეროდრომი, საიდანაც მიფრინავდნენ რუსული გამანადგურებლები და ბომბდამშენები უკრაინის სამხრეთისკენ.
გუშინ უკრაინული მედია ინტენსიურად ავრცელებდა რუკებს, რაც ასახავდა უკრაინის ხელისუფლების კონტროლირებადი ტერიტორიებიდან მანძილს ყირიმში, ნოვოფედოროვკას აეროდრომამდე. თუ დადასტურდება, რომ აეროდრომი უკრაინამ ააფეთქა, ეს იმას ნიშნავს, რომ მას უკვე მიღებული აქვს ჰაიმარსის რაკეტები, რომლებიც 300 კილომეტრზე მიფრინავენ.
რუსეთის ხელისუფლებამ განაცხადა, რომ აფეთქება უკრაინული მხარის თავდასხმის შედეგად არ მომხდარა და მან აფეთქების მიზეზად იარაღის საცავში „დეტონაცია“ დაასახელა. თავის მხრივ, აფეთქებასთან კავშირს არ ადასტურებენ უკრაინის ოფიციალური პირები.
