უკრაინის პრეზიდენტის მრჩეველი ოლექსი არესტოვიჩი თურქეთის პოლიტიკას აკრიტიკებს და აცხადებს, რომ ოფიციალური სტამბოლი, რუსეთთან თანამშრომლობით, NATO-ს მთლიანობას არღვევს. მისი თქმით, თურქეთის პოლიტიკით უკმაყოფილოა დასავლეთიც.
„მთავარი ბრალდება ისაა, რომ თურქეთი NATO-ს მთლიანობას არღვევს თავისი განსაკუთრებული ურთიერთობებით რუსეთის ფედერაციასთან, რომელიც ალიანსის სტრატეგიულ მოწინააღმდეგედ სახელდება. ეს უკიდურესად არალოიალური ქცევაა“, – აღნიშნა არესტოვიჩმა.
პრეზიდენტის მრჩეველი დარწმუნებულია, რომ ახლა თურქეთის ხელისუფლება „დანისპირზე დადის“, რადგან ბევრი ქვეყანა უკვე ზომების მიღების აუცილებლობაზე ლაპარაკობს.
„საკითხი ასე დგას, შეუძლია თუ არა NATO-ს ეს უპასუხოდ დატოვოს. ვერ დატოვებენ, თუკი ოდნავ მაინც მნიშვნელოვანია მათთვის ალიანსის ერთიანობა და ავტორიტეტი,“ – აცხადებს უკრაინის პრეზიდენტის მრჩეველი.
ოლექსი არესტოვიჩის განცხადებებს წინ რუსეთისა და თურქეთის მოლაპარაკებები უძღოდა.
5 აგვისტოს სოჭში შედგა რეჯეფ თაიფ ერდოღანისა და ვლადიმერ პუტინის შეხვედრა, მეორე დღეს კი თურქეთის პრეზიდენტმა განაცხადა, რომ თურქეთი დათანხმდა რუსული გაზის საფასური ნაწილობრივ რუბლში გადაიხადოს.
თურქეთმა თავის ტერიტორიაზე „მირის“ რუსული საბანკო ბარათებიც დაუშვა.
____
მთავარი ფოტო: 5 აგვისტო. რეჯეფ თაიფ ერდოღანისა და ვლადიმერ პუტინის შეხვედრა სოჭში