ესტონეთის საგარეო საქმეთა მინისტრი ურმას რეინსალუ მიიჩნევს, რომ უკრაინაში რუსეთის აგრესიის გამო სამართლებრივი პასუხისმგებლობა რუსეთის უმაღლეს პოლიტიკურ და სამხედრო ხელმძღვანელობას უნდა დაეკისროს, მათ შორის, ვლადიმერ პუტინს.
მინისტრის თქმით, ესტონეთი მზადაა, დაეხმაროს უკრაინას ამ საკითხზე საერთაშორისო შეთანხმების მიღწევაში. სწორედ ამ მიზნით შეხვდა რამდენიმე დღის წინ რეინსალუ უკრაინის პრეზიდენტს, პრემიერ-მინისტრსა და საგარეო საქმეთა მინისტრს.
„ეს მოითხოვს მჭიდრო თანამშრომლობას სახელმწიფოებს შორის და საერთაშორისო შეთანხმებას. უკრაინამ უკვე მოამზადა ამ შეთანხმების რამდენიმე პროექტი, რომლებსაც ჩვენ მხარს დავუჭერთ,“ – ამბობს რეინსალუ.
მინისტრის აზრით, მეორე და მთავარი კითხვა ისაა, შესაძლებელი იქნება თუ არა ამგვარი პასუხისმგებლობა დაეკისროს, მაგალითად, პუტინს: „თუმცა ცხადია, რომ დიპლომატიური ხელშეუხებლობა, რომლითაც სახელმწიფოს მეთაური სარგებლობს, არ ვრცელდება გენოციდის ჩამდენებზე. კაცობრიობას ახალი ნიურნბერგი სჭირდება“.
რეინსალუ ხაზს უსვამს, რომ იმ ქვეყნებმა, რომლებსაც რუსეთთან და პუტინთან ურთიერთობების ძველ, ნორმალურ მდგომარეობაში დაბრუნება სურთ, უნდა გააცნობიერონ, რომ ეს შეუძლებელია.
„ეს არის გენოციდი და ურთიერთობა ძველებურ, უმაღლეს დონეზე, გენოციდის ჩამდენ პოლიტიკოსებთან არ შეიძლება გახდეს ახალი ნორმა. ამიტომ საჭიროა სამართლებრივი პასუხისმგებლობის კონცეფცია – მან უნდა შექმნას წესები, რომელთა მიხედვითაც გვექნება ურთიერთობა რუსეთთან ან საერთოდ არ გვექნება,“ – განაცხადა მინისტრმა და დასძინა, რომ უსაფრთხოება ესტონეთისთვის სიკვდილ-სიცოცხლის საკითხია, თუმცა სხვა ქვეყნებთან ამ საკითხზე უკრაინასაც და ესტონეთსაც ბევრი მუშაობა მოუწევთ.
მთავარი ფოტო: ურმას რეინსალუს შეხვედრა ვოლოდიმირ ზელენსკისთან/ფოტო: president.gov.ua
