დედა-შვილს, რომლებსაც კრამატორსკის ვაგზლის დაბომბვის შემდეგ კიდურების ამპუტაცია დასჭირდათ, პროთეზები კალიფორნიაში გაუკეთეს.
რუსეთის ძალებმა კრამატორსკის რკინიგზის სადგურს 8 აპრილს დაარტყეს. აფეთქება მაშინ მოხდა, როდესაც დედა-შვილი მატარებლის ბაქანზე ჩაის რიგში იდგა. დედამ, ნატალია სტეპანენკომ, ერთი ფეხი დაკარგა, 11 წლის იანამ კი – ორივე. დაბომბვას გადაურჩა იანას ტყუპისცალი იაროსლავი, რომელიც სადგურის შენობის შიგნით დარჩა ნივთების სადარაჯოდ.
ლვოვში ერთთვიანი რეაბილიტაციის შემდეგ დედა-შვილი შეერთებულ შტატებში გადაიყვანეს. ისინი ახლა სიარულს ხელახლა სწავლობენ.
ნატალიასა და იანას ფოტოს ინსტაგრამზე ლვოვის მერი აქვეყნებს.
„პირველ ფოტოში სტეპანენკოების ოჯახია კრამატორსკის დაბომბვის შემდეგ, მეორეში – ნატალია და იანა უკვე პირველ ნაბიჯებს დგამენ. ამ ორ ფოტოს შორის იყო რამდენიმეთვიანი რეაბილიტაცია“, – წერს ანდრეი სადოვი და იქვე იანას ექიმის, პიტერ ჰერშის ციტატასაც აქვეყნებს:
„ის ჯოჯოხეთში იყო და იქიდან დაბრუნდა. პუტინს სურს შეაჩეროს უკრაინა, მაგრამ მას 11 წლის გოგოს შეჩერებაც კი არ შეუძლია. შეხედეთ მას! ის ააფეთქეს, მაგრამ ის დაუმარცხებელი აღმოჩნდა“.
ნატალია და იანა აშშ-ში გამგზავრებამდე/ფოტო: ლვოვის მერის ინსტაგრამიდან
რეაბილიტაცია ხანგრძლივი იქნება. ოჯახს შეერთებულ შტატებში დარჩენა დაახლოებით ერთი წელი მოუწევს, პროთეზირების პროცესის დასრულების შემდეგ კი სტეპანენკოები უკრაინაში დაბრუნდებიან. მათ იმედი აქვთ, რომ ამ დროისთვის მათ სამშობლოში ომი აღარ იქნება.
უკრაინისა და შეერთებული შტატების შეთანხმებით, უკრაინელი ბავშვები, რომლებმაც ომის დროს კიდურები დაკარგეს, მკურნალობას აშშ-ში გაივლიან.
მთავარი ფოტო: ლვოვის მერის მიერ ინსტაგრამზე გამოქვეყნებული ფოტოები
