დიდი ბრიტანეთის დაზვერვის უახლესი ცნობებით, რუსეთის ძალები კონცენტრირებულნი არიან უკრაინის სამხრეთით. ისინი სავარაუდოდ, უკრაინელთა კონტრშეტევას ელოდებიან, ან თავად ემზადებიან ახალი შეტევისთვის.
უწყების ინფორმაციით, რუსეთის სამხედრო კოლონები, სატვირთო მანქანებით, ტანკებით, არტილერიითა და სხვა შეიარაღებით, დონბასის რეგიონს ტოვებს და სამხრეთისკენ მიემართება. ტექნიკის გადაადგილება შეიმჩნევა ოკუპირებული მელიტოპოლიდან, ბერდიანსკიდან, მარიუპოლიდან და რუსეთიდან, ყირიმის ხიდის გავლით.
დიდი ბრიტანეთის 6 აგვისტოს რელიზის თანახმად, ყირიმში რუსეთმა ასევე გადაისროლა 800-1000 ადამიანისგან შემდგარი ტაქტიკური ჯგუფები, რომლებსაც, სავარაუდოდ, ხერსონში მყოფი რუსული არმიის დასამხარებლად გამოიყენებენ.
„უკრაინის ძალები კვლავაც განაგრძობენ ხიდების, საბრძოლო მასალების საწყობების და სარკინიგზო კვანძების მიზანში ამოღებას. უკრაინელთა შეტევების სიხშირე განსაკუთრებით სამხრეთ რეგიონში გაიზარდა,“ – წერს დიდი ბრიტანეთის დაზვერვა და დასძენს, რომ უკრაინის არმია ყველა შესაძლებლობას იყენებს, რათა ხელი შეუშალოს რუსეთს თავისი ძალების მომარაგებაში.
უწყების შეფასებით, „რუსეთის ომი უკრაინაში სადაცაა ახალ ფაზაში შევა. მძიმე ბრძოლები გადაინაცვლებს სამხრეთ აღმოსავლეთით, ზაპოროჟიედან ხერსონამდე, მდინარე დნეპრის გასწვრივ, 350 კილომეტრზე გადაჭიმულ ფრონტზე.“
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება ზაპოროჟიეს ატომურ ელექტროსადგურზე არსებულ მდგომარეობას მიმოიხილავდა და აღნიშნავდა, რომ რუსების მიერ განხორციელებულმა ქმედებებმა სერიოზული საფრთხე შეუქმნა ზაპოროჟიეს ატომური ელექტროსადგურის უსაფრთხოებასა და დაცულობას.
