ინგლისური ენისა და ლიტერატურის მასწავლებელს, ირინა გენს, რუსეთში 5 წლით თავისუფლების აღკვეთა მიუსაჯა სასამართლომ. გენი პენზას ოლქის სკოლაში ასწავლიდა. ამის შესახებ ინფორმაციას Настоящее Время ავრცელებს.
სასამართლომ დაადგინა, რომ ირინა გენი „მტრულად იყო განწყობილი რუსეთის პრეზიდენტის მიმართ და ავრცელებდა აშკარად ცრუ ინფორმაციას რუსეთის შეიარაღებული ძალების შესახებ“.
ბრალდების საფუძვლად იქცა მოსწავლეებისა და მასწავლებლის საუბარი. გენი მოსწავლეებს რუსეთ-უკრაინის ომის შესახებ ესაუბრებოდა, რომ რუსმა ჯარისკაცებმა დაბომბეს სამშობიარო სახლი მარიუპოლში, გეგმავდნენ უკრაინის პრეზიდენტის გადაგდებას, რომ 2014 წელს ჩამოაგდეს მალაიზიის სამგზავრო თვითმფრინავი და სხვის ტერიტორიებს იტაცებდნენ.
მასწავლებლის საუბარი რამდენიმე მოსწავლემ დიქტოფონზე ჩაწერა. აუდიოჩანაწერები პოლიციის ხელში აღმოჩნდა და მალევე მასწავლებელი სისხლის სამართლის მუხლით გაასამართლეს.
ირინა გენს, გარდა იმისა, რომ სასამართლომ ხუთი წლით თავისუფლების აღკვეთა მიუსაჯა, აეკრძალა მასწავლებლობაც, სამი წლით.
ადვოკატი დარწმუნებულია, რომ საუბარი სპეციალურად წამოიწყეს მოსწავლეებმა და ეს დაგეგმილი პროვოკაცია იყო.
ირინა გენის ადვოკატის განმარტებით, ხუთ მერვეკლასელ მოსწავლეს აზრად არ მოუვიდოდა დამოუკიდებლად მასწავლებლის საუბარი ჩაეწერა დიქტოფონზე და ფსბ-სთვის გადაეცა ჩანაწერები.
ადვოკატი ვარაუდობს, რომ ერთ-ერთი მოსწავლის მშობელი ფსბ-ს თანამშრომელია.
შეიარაღებული ძალების დისკრედიტაციის მიზნით ცრუ ინფორმაციის გავრცელება რუსეთში 15 წლამდე პატიმრობასაც ითვალისწინებს. ამ მუხლით რუსეთში ერთი თვის წინ დააპატიმრეს პირველი ბრალდებული.
___
ფოტო: ირინა გენის ფეისბუქგვერდიდან
