ნეტგაზეთი • RU
PODOLIAKI

ეს იყო განზრახ მკვლელობა, ზუსტი დარტყმა მის სახლზე – პოდოლიაკი ვადატურსკის დაღუპვაზე

უკრაინის პრეზიდენტის მრჩეველი, მიხაილო პოდოლიაკი ტელეგრამზე წერს, რომ ცნობილი უკრაინელი ბიზნესმენის, ალექსეი ვადატურსკის დაღუპვა მიკოლაევში დაბომბვისას იყო არა შემთხვევითი, არამედ გამიზნული მკვლელობა.

უკრაინელი ბიზნესმენი, კომპანია „ნიბულონის“ მფლობელი, უკრაინის ერთ-ერთი ყველაზე მდიდარი ადამიანი, ალექსეი ვადატურსკი და მისი მეუღლე, რაისა დღეს, 31 ივლისს, მიკოლაივის დაბომბვის შედეგად დაიღუპნენ.

„ჩემი აზრით, ვადატურსკის სიკვდილი იყო არა უბედური შემთხვევა, არამედ კარგად გააზრებული და ორგანიზებული განზრახ მკვლელობა.

ვადატურსკი იყო ერთ-ერთი უმსხვილესი ფერმერი ქვეყანაში, საკვანძო პირი რეგიონში და მსხვილი დამსაქმებელი. რაკეტის ზუსტი დარტყმა არა მხოლოდ მის სახლზე, არამედ კონკრეტულ ფრთაზე – საძინებელში – ეჭვს არ ტოვებს – ვადატურსკი იყო კონკრეტული სამიზნე.

რუსი ბარბაროსები აგრძელებენ ტერორის კამპანიას, ცდილობენ დააშინონ და გატეხონ უკრაინული საზოგადოება.

კრემლის მანიაკების აზრით, მაღალი ინტენსივობის ტერორისტული თავდასხმების გახმაურებულმა კამპანიამ (ვიდეოზე ჩაწერილმა ჩვენი ტყვეების დაცინვამ და დასახიჩრებამ; სარაკეტო თავდასხმამ ვინიცის ოფიცერთა სახლზე; ყაზარმის შიდა აფეთქებამ ჩვენს ბიჭებთან ოლენივკაში და ცნობილ ადამიანზე დარტყმამ, რომელსაც მარცვლეულთან პირდაპირი კავშირი აქვს), უნდა აიძულოს უკრაინელები დაიჩოქონ, გააღონ კარი და ჩააბარონ სახელმწიფო.

ყოველი დანაშაული ტკივილს გვაყენებს, მაგრამ ჩვენ გადავიტანთ და ვხდებით უფრო ძლიერი.

ვუსამძიმრებ ვადატურსკის ოჯახს და ახლობლებს. ის იყო უკრაინის გმირი, სახელმწიფოს თავდადებული, თავისი საქმის ფანატიკოსი და უკრაინული ბიზნესის ლეგენდა“ – წერს პოდოლიაკი.

ამავე თემაზე: 

უკრაინელი მილიონერი ცოლთან ერთად დაიღუპა მიკოლაივის დაბომბვის შედეგად

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.