ბათუმის მე-15 საჯარო სკოლის ტერიტორიაზე ახალი კორპუსი და სპორტდარბაზი უნდა აშენდეს. სამუშაოები დაწყებულია, თუმცა პროექტში შედის ცვლილება. ერთსართულიან სპორტდარბაზს, რომელიც ცალკე უნდა აშენებულიყო, დაემატება ორი სართული, სადაც საკლასო ოთახები განთავსდება. პროექტის ცვლილება სპორტდარბაზის ზომებში შემცირებასაც გამოიწვევს.
დოკუმენტების მიხედვით „N15 საჯარო სკოლა მდებარეობს ბათუმის ცენტრალურ ნაწილში, სადაც მკვეთრად გაიზარდა მოსახლეობის რაოდენობა და შესაბამისად, სკოლა მოსწავლეების რაოდენობის ზრდას ვეღარ აკმაყოფილებს. სწორედ ეს იყო მიზეზი იმისა, რის გამოც დაიწყო აღნიშნული სკოლის რეკონსტრუქცია, თუმცა ამ ეტაპზე არც ეს არის საკმარისი.
სკოლის მოთხოვნა საფუძვლიანია, რადგან არსებული პროექტით სპორტდარბაზის აშენების შემდეგ, მასზე რაიმე სართულების დამატება შეუძლებელია, მაშინ როცა პროექტის კორექტირების შემთხვევაში შესაძლებელია მცირედით შემცირდეს სპორტდარბაზის ზომები და მასზე დაშენდეს კიდევ ორი სართული, სადაც განთავსდება არანაკლებ 12 საკლასო ოთახი, რაც ნიშნავს არანაკლებ დამატებით 600 მოსწავლეს ორ ცვლაში.“
არსებული პროექტის ფარგლებში „სკოლის ძირითად შენობაზე უნდა მიშენდეს ორი კორპუსი, მათგან: პირველი კორპუსი – სამსართულიანია და მასში განთავსდება საკლასო ოთახები და სააქტო დარბაზი. აღნიშნული კორპუსის კონსტრუქციული ნაწილის მშენებლობა [14 ივლისის მდგომარეობით] დასრულების ეტაპზეა; მეორე კორპუსი კი – ერთსართულიანია და მასში უნდა განთავსდეს სპორტდარბაზი, დამხმარე სათავსებით. აღნიშნული კორპუსის მშენებლობა არ არის დაწყებული.“
აჭარის განათლების სამინისტროს მიერ საპროექტო დოკუმენტაცია შესყიდულია 2019 წელს სს ,,აჭარკაპმშენი’’-სგან, ღირებულებით 25 000 ლარი. ამჯერად პროექტში კორექტირებას იგივე კომპანია 15 ათას ლარად შეიტანს. სამინისტრომ შესყიდვების სააგენტოსგან შესაბამისი თანხმობა უკვე მიიღო.
მშენებლობას შპს „ალიგატორი 1“ აწარმოებს, რომელთანაც ხელშეკრულება [სამსართულიანი შენობის მიშენებისა და სპორტდარბაზისთვის] 2 784 107 ლარზე არის გაფორმებული. ხელშეკრულების მიხედვით მშენებლობა 2023 წლის ივლისში უნდა დასრულებულიყო.
პროექტის ცვლილებიშ გამო რამდენით გაიზრდება სახელშეკრულებო თანხა და შეიცვლება თუ არა მშენებლობის დასრულების ვადა, ჯერ უცნობია. ეს ახალი ხარჯთაღრიცხვის შედგენის შემდეგ გამოჩნდება.
—
აჭარის განათლების სამინისტროს ბათუმის მე-15 საჯარო სკოლის არსებულ შენობაზე მიშენება-რეკონსტრუქციის სამუშაოებზე ტენდერი 2 986 577 ლარით ჰქონდა გამოცხადებული:
ბათუმის მე-15 სკოლას ახალ კორპუსს მიაშენებენ – ბიუჯეტიდან 2,9 მილიონია გამოყოფილი
