შედგება თუ არა საპარლამენრტო არჩევნებისთვის დუმბაძე-ჩერნოვეცკის ტანდემი? – პარლამენტის ვიცე-სპიკერი მურმან დუმბაძე „ბათუმელებთან“, როგორც ადრე, ახლაც აცხადებს, რომ ის ამას არ გამორიცხავს, თუმცა ლეონიდ ჩერნოვეცკის მიერ საარჩევნო სიის პირველი ათეულის დასახელებას ელოდება და ოფიციალურ განცხადებას შემდეგ გააკეთებს.
ერთგვარი კონსულტაციები ახლაც არის. ჩვენ მაქსიმალურად ვცდილობთ ახალი პოლიტიკური პარტია შემოვიდეს, ასე ვთქვათ, საარჩევნო ბაზარზე. ყოველთვის ვამბობდი და არ დამიმალავს, რომ ამ პოლიტიკური ძალის უკან დგას შესაბამისი ფინანსური უზრუნველყოფა, რაც მნიშვნელოვანია პარტიის განვითარებისთვის. მაგრამ ჩვენ არ უნდა მივიღოთ ქვეყანაში ისეთი პოლიტიკური ორგანიზაცია, რომელიც ერთადერთი იქნება ფინანსური უზრუნველყოფის თვალსაზრისით. ალტერნატივები უნდა გაჩნდეს. ამ კუთხით ჩერნოვეცკის შემოსვლა პოლიტიკაში [მას საკმაო პოლიტიკური გამოცდილებაც აქვს] ძალიან მნიშვნელოვანი იქნება ქართული სახელმწიფოსთვის. და არა მარტო ის, თუ გამოჩნდებიან სხვა ადამიანებიც, კარგი იქნება პარტიული კონკურენციისთვის – ამ პოზიციიდან გამოვდივარ.
უშუალოდ თქვენი დამოკიდებულება როგორია ლეონიდ ჩერნოვეცკისადმი დღეს, როცა მან, მისმა პარტიამ – „ბედნიერი საქართველოსთვის“, ფაქტობრივად, დაიწყო წინასაარჩევნო კამპანია?
მინდა გითხრათ, რომ ბატონ ლეონიდს აქვს საკუთარი ხედვები. ჩვენ არაერთხელ გვისაუბრია და ის ამბობს, რომ მას აინტერესებს რას შესთავაზებს თვითონ საზოგადოება, ვთქვათ, პარტიული სიის დაკომპლექტების პროცესში. ეს, ბუნებრივია, ძალიან ბევრ კითხვით ნიშანს სვამს. მაგრამ ვფიქრობ, გარკვეული გამოცდილება მას ამ თვალსაზრისით აქვს და მოდი ესეც გავსინჯოთ. ვნახოთ საზოგადოება რას შესთავაზებს, ეს სიახლეა პოლიტიკაში… მე კი მაინც მგონია, რომ პოლიტიკაში უნდა იყვნენ ადამიანები, რომლებიც პოლიტიკური წონისანი არიან და, ასე ვთქვათ, პოლიტიკურ გადაწყვეტილებებს იღებენ არა მარტო კონკრეტული არჩევნების დროს, არამედ მთლიანად, პროცესების მიმდინარეობისას ქვეყანაში. ამიტომ, როგორც კი პირველი ათეული დასახელდება მის მიერ, ამის შემდეგ ოფიციალურ განცხადებას გავაკეთებთ, თუ როგორი იქნება ჩვენი ურეთიერთობა მასთან.
ანუ, თანამშრომლობას არ გამორიცხავთ?
პოლიტიკურ პარტიასთან ვითანამშრომლებ თუ არა, ჩემთვის გადამწყვეტი მნიშვნელობა აქვს იმას, თუ რა დამოკიდებულება აქვს ამა თუ იმ პარტიას ყოფილ ხელისუფლებასთან – „ნაციონალურ მოძრაობასთან“ და რა დამოკიდებულება ექნება „ქართულ ოცნებასთან“. მე არასოდეს დამიმალავს ჩემი ანტისიმპათია „ნაციონალური მოძრაობის“ მიმართ და ძალიან მალე, როგორც კი მოვედით ხელისუფლებაში, „ანტაგონისტურად“ ვარ განწყობილი „ქართული ოცნების“ მიმართ. პარტიასთან, რომელიც კონკურენციაში არ შედის ამ პარტიებთან, ბუნებრივია, ვერ ვითანამშრომლებ. ამით იმის თქმა მინდა, რომ ვითანამშრომლებ ნებისმიერ პოლიტიკურ გაერთიანებასთან, რომელიც კონკურენციაში იქნება ზემოაღნიშნულ ორ პარტიასთან.
ლეონიდ ჩერნოვეცკის პარტია არის კონკურენციაში ამ პარტიებთან?
ის, რაც კეთდება ლეონიდის მიერ, ვერ არის ბოლომდე პოლიტიკურად გაბედული ნაბიჯები, რაც ჩემთვის მოსაწონი არ არის, მაგრამ იმას, რაც მან ილაპარაკა ჩემთან და ხედვები, რაც მან თეზისების სახით გამოაქვეყნა, ვიზიარებ. ანუ ვიზიარებ მის ხედვებს საკადრო, თვითმმართველობის, მმართველობის სისტემის მიმართულებით, თავისუფალი ეკონომიკური ზონების მიმართულებით და მათ შორის სოციალურ პროგრამებსაც.
იმავე ხედვებში, რაც ახსენეთ და რასაც ეთანხმებით, ლეონიდ ჩერნოვეცკისა და მისი პარტიის ხედვა არ ჩანს, ან ბუნდოვანია ნატოსთან, რუსეთთან ურთიერთობებსა თუ სხვა საკითხებზე…
ის ამბობს, რომ მისი ღირებულებები ემთხვევა დასავლურ ღირებულებებს – ეს არის მეტი დემოკრატია, ეს არის მეტი კონკურენცია, მეტი თავისუფლება… ანუ ეს ემთხვევა იმას, რასაც ჩვენ ვაჟღერებთ. ბუნებრივია, ჩვენ გვილაპარაკია ამ თემაზე, რაც მას პროგრამაში [თუმცა, ეს არ არის, როგორც ასეთი – პარტიის პროგრამა] ნახსენები არ აქვს, თუმცა, ასე ვთქვათ, ვექტორული თვალსაზრისით, ჩვენი პოზიციები ემთხვევა.
თქვენ ხომ არ დაგიწყიათ საკუთარი პარტიის საარჩევნო სიაზე მუშაობა?
არა. მაგრამ მე ვამბობ, რომ ვითანამშრომლებ ნებისმიერ პარტიასთან გარდა „ნაციონალური მოძრაობისა“ და „ქართული ოცნებისა“… მათ შორის ვითანამშრომლებთ ლეონიდ ჩერნოვეცკის ახალდაბადებულ პარტიასთანაც, მაგრამ ის უფრო ლოგიკურად უნდა ჩამოყალიბდეს, უფრო გაბედულად მიკროფონთან და არა მარტო პირად საუბრებში. მე მგონია, რომ ის რაღაც ხათრს უწევს რომელიღაც პოლიტიკურ პარტიას, რაც ჩემთვის არ არის მისაღები.
15 აპრილს, პარტიის ქობულეთის ოფისის გახსნაზე, ლეონიდ ჩერნოვეცკიმ განმარტა, რომ იგი მურმან დუმბაძესთან ერთად არ აპირებს საარჩევნო კამპანიაში ჩართვას – „არაფერი ასეთი არ ყოფილა, გარდა დუმბაძის გაცნობისა. ის ჩემთან იყო სახლში. ჩემზე კარგი შთაბეჭდილება დატოვა, მგონი საქართველოს პატრიოტია და ბევრი კარგი საქმის გაკეთება უნდა“.
