“ანბანის კოშკში” ამ დროისთვის სარემონტო სამუშაოებიც კი არ ტარდება. მიუხედავად ამისა, კომპანიის მმართველი პარტნიორი [როგორც ის თავის თავს უწოდებს] შალვა მელაძე ირწმუნება, რომ “ბუსტ ჯორჯია” აღებულ ვალდებულებებს ამჯერად შეასრულებს. ახალი შეთანხმებით, ინვესტორს ამისთვის 2016 წლის მაისამდე აქვს ვადა – ამ დრომდე “ანბანის კოშკში” კაფე, გალერეა, გადმოსახედი და ლიფტები უნდა მოეწყოს. 15 მაისს აჭარის მთავრობა საკურორტო სეზონს გახსნის. ანბანის კოშკი არჩილ ხაბაძემ კომპანიას 1 ლარად გადასცა 20 წლის ვადით.
შალვა მელაძე კომპანიის მენეჯმენტში ახალი სახეა. “ბუსტ ჯორჯიას” მფლობელებს მისი “რუსული გამოცდილების” იმედი აქვთ. ამაზე ცოტა ხნის წინ “ბათუმელებს” კომპანიის თანამფლობელი ზურა ნასყიდაშვილი ესაუბრა:
“ის ახალგაზრდა ბათუმელი ბიჭია, რომელიც რუსეთში მოღვაწეობდა და აქვს კარგი კავშირები. ის ფულით არ შემოდის, ჩვენ მხოლოდ მისი გამოცდილება გვჭირდება. ევროპული მენეჯმენტი უნდა ყოფილიყო, ახლა რუსი და რუსულენოვანი ტურისტების მოზიდვაზე უნდა ვიმუშაოთ, რომლებიც სეზონზე ჩამოდიან ბათუმში”.
მანამდე კი ვრცელდებოდა ინფორმაცია, რომ კომპანია წილებს რუსეთში მოღვაწე ქართველ ბიზნესმენზე ყიდდა, თუმცა ეს არ დადასტურდა. შალვა მელაძე – ახალი მმართველი პარტნიორი, კომპანიაში ინვესტიციის განხორციელებას არ გეგმავს. ის მუშაობს “ანბანის კოშკის” მართვის კონცეფციაზე, რომელსაც “მალე კომპანიის მფლობელებს წარუდგენს”. „ატმ-ანბანის კოშკის მენეჯმენტს“კიდევ ერთი ახალი მმართველი ჰყავს, – ოლეგ სანდროშვილი კომპანიის დირექტორად 2016 წლის 19 თებერვალს დაარეგისტრირეს.
შალვა მელაძის ინფორმაციით, “ანბანის კოშკში” სამუშაოების ჩასატარებლად სპეციალისტების პოვნა ბათუმში ვერ მოხერხდა, რის გამოც სამუშაოები გაჭიანურდა. თუმცა ამ დროისთვის დარჩენილია მხოლოდ ლიფტების ექსპლუატაციაში შეყვანა. უახლოეს პერიოდში, “ანბანის კოშკში” საზაფხულო კაფე გაიხსნება. პარალელურად კომპანია აწარმოებს მოლაპარაკებას მერიის შესაბამის სამსახურებთან “ანბანის კოშკზე” სარეკლამო ეკრანების დამონტაჟებასთან დაკავშირებით”.
შალვა მელაძის თქმით, ანბანის კოშკის ახალი კონცეფცია დემოკრატიული იქნება ფასებთან მიმართებაში. გარდა ამისა, კოშკის ყველა სართულის ინფრასტრუქტურა აეწყობა ისე, რომ ტურისტი შიგნით გაერთოს: “შემდეგისთვის გვაქვს უფრო გრანდიოზული იდეები ობსერვატორიის გახსნაზე, რაც, ჯერჯერობით, დაყოვნდება. ასევე გაიხსნება შემეცნებითი ცენტრი მედიათეკა. ვიცით, რომ ვალდებულები ვართ სახელმწიფოს წინაშე და ვცდილობთ არ დავარღვიოთ დედლაინები. საზოგადოების ყურადღება ჩვენკენაა მოპყრობილი და ჩვენ მათ ამ ხალისს არ გავუცრუებთ.”
“ანბანის კოშკი” ბათუმის ბულვარში, რომლის მშენებლობისთვისაც ბათუმის ბიუჯეტიდან 60 მილიონზე მეტი ლარი დაიხარჯა, აჭარის მთავრობამ კომპანია „Boost Spain S.I“-ს 20 წლის ვადით, სიმბოლურ ფასად – 1 ლარად გადასცა. „ანბანის კოშკში“ გასართობი ობიექტები ინვესტორს ხელშეკრულების დადებიდან სამ თვეში უნდა გაეხსნა. ხელშეკრულება 2015 წლის ივნისში გაფორმდა.
კომპანიას სარგებლობაში გადაცემული ქონების მშენებლობის დროს გამოყენებული ტექნოლოგიური პროცესების დაცვით დამუშავება ევალებოდა. ასევე ხელშეკრულების გაფორმებიდან სამ თვეში ლიფტების გამართულობა და ექსპლუატაციაში გაშვება უნდა უზრუნველეყო. იმავე ვადაში უნდა გამართულიყო განათების სისტემა.
ეს ყველაფერი კომპანიამ ობიექტის სარგებლობის პერიოდში უნდა შეინარჩუნოს. საბოლოო ჯამში კი, ხელშეკრულების დადებიდან სამ თვეში, ანუ გასული წლის სექტემბერში კომპანიას კოშკში მრავალფუნქციური ობიექტები: რესტორანი და კაფე უნდა აემოქმედებინა. კომპანიას უნდა უზრუნველეყო „მიმზიდველი ადგილის მოწყობა ტურისტებისთვის ქალაქის ხედების დასათვალიერებელი გადმოსახედის სახით“, ინვესტორს საქართველოს არანაკლებ ათი მოქალაქე უნდა დაესაქმებინა.
რეესტრის მონაცემებით „Boost Spain S.I“ – ესპანური კომპანიაა და მისი დამფუძნებელი ესპანეთის მოქალაქე ბართლომეო სორელ სელმანკაა. ამავე მონაცემებით, ბართლომეო სორელ სელმანკა ფლობს საქართველოში 2015 წლის აპრილში დარეგისტრირებული კომპანიის – „ბუსტ ჯორჯიას“ 67 პროცენტს, დარჩენილი 33 პროცენტის მფლობელი კი საქართველოს მოქალაქე ზურაბ ნასყიდაშვილია. მათვე დააფუძნეს „ატმ-ანბანის კოშკის მენეჯმენტი“. „ატმ-ანბანის კოშკის მენეჯმენტის“ 100%-ის მფლობელი „ბუსტ ჯორჯიაა“.
