აშშ-ის ომის კვლევის ინსტიტუტის (ISW) ცნობით, ომის მიმდინარე ეტაპზე, რუსეთი სლოვიანსკზე მეტად პრიორიტეტს სივერსკისა და ბახმუტის დაკავებას მიანიჭებს.
ინსტიტუტის ანალიტიკოსები აღნიშნავენ, რომ რუსეთის ამგვარი გეგმის არსებობას ადასტურებს სერგეი შოიგუს შეხვედრა „აღმოსავლეთის“ სარდლობის მეთაურთან, გენერალ ლეიტენანტ რუსტამ მურადოვთან.
შეხვედრა გუშინ 18 ივლისს შედგა. რუსეთის თავდაცვის სამინისტროს ინფორმაციით, სერგეი შოიგუმ რუსტამ მურადოვს უკრაინის შორსმოქმედი სისტემების განადგურება დაავალა.
როგორც ექსპერტები აღნიშნავენ, რუსეთის თავდაცვის სამინისტრომ პირველად ახსენა „აღმოსავლეთის“ სარდლობა. მანამდე ცნობილი იყო მხოლოდ ცენტრალური და სამხედრო სარდლობის შესახებ, რომლებსაც გენერალ პოლკოვნიკი ალექსანდრ ლაპინი და გენერალი სერგეი სუროვიკინი მეთაურობენ.
„მურადოვს, რომელიც იზიუმის მიმართულებას ხელმძღვანელობს, უფრო დაბალი რანგი აქვს, ვიდრე ლაპინსა და სუროვიკინს. ეს მიანიშნებს, რომ კრემლი იზიუმ-სლოვიანსკის რაიონს ნაკლებ მნიშვნელოვნად მიიჩნევს, ვიდრე დონბასის სხვა ტერიტორიებს,“ – მიუთითებს ომის კვლევის ინსტიტუტი და დასძენს, რომ სავარაუდოდ, კრემლი სამხედრო რესურსებს სივერსკისა და ბახმუტისკენ მიმართავს.
რუსეთის არმიის გააქტიურებაზე სივერსკისა და ბახმუტის მიმართულებით, რამდენიმე დღის წინ დიდი ბრიტანეთის დაზვერვაც წერდა. უწყება აღნიშნავდა, რომ სივერსკის შემდეგ, რუსების სამიზნე ბახმუტი გახდება.
