ნეტგაზეთი • RU

დაგვეხმარეთ, რუსულენოვან მოსახლეობას გავაგებინოთ სიმართლე – Dron.media

საერთაშორისო ჟურნალისტების გამოცდილმა გუნდმა უკრაინიდან, ყირგიზეთიდან და თურქმენეთიდან რუსული პროპაგანდის წინააღმდეგ ახალი, რუსულენოვანი საინფორმაციო ვებგვერდი – Dron.media შექმნა.

მოსკოვის აგიტატორები მარტივად სწვდებიან ქვეყნებს, სადაც რუსულენოვანი უმცირესობები ცხოვრობენ და თესავენ განხეთქილებას

როგორც დამფუძნებლები წერენ, ახალი გამოცემის მთავარი ფოკუსი ის ქვეყნებია, სადაც რუსულენოვანი მოსახლეობა ცხოვრობს. მათ შორისაა საქართველო და კავკასიის რეგიონიც, ისევე როგორც ყირგიზეთი, ყაზახეთი, თურქმენეთი, ტაჯიკეთი, უზბეკეთი, რუსეთი, ბელარუსი და უკრაინა.

Dron.media-ს დამფუძნებლები გვპირდებიან, რომ ამ ქვეყნების რუსულენოვან მოსახლეობას მათთვის საინტერესო და რელევანტურ საკითხებზე ინფორმაციას ადგილობრივი რეპორტიორები მიაწვდიან.

„რუსი სამხედროები აგრძელებენ უკრაინის მშვიდობიანი მოსახლეობის დახოცვას, გაუპატიურებასა და დასახიჩრებას. ბუჩის ომის საფლავების, მარიუპოლის დაბომბვის თავშესაფრებისა და ხერსონის წამების კამერების შესახებ ხმა მთელ მსოფლიოს სწვდება, მაგრამ არა თავად რუსეთს, – რატომ?

იმიტომ, რომ რუსების უმრავლესობა წვეთწვეთობითაა ნაკვები კრემლის პროპაგანდით. იგი ჩახლართული და შემპარავია; და მისი სამიზნე არ არის მხოლოდ რუსეთის მოსახლეობა, მოსკოვის აგიტატორებს თავიანთი გზავნილის მთელ მსოფლიოში გავრცელებისთვის აქვთ რესურსები. ისინი მარტივად სწვდებიან ქვეყნებს, სადაც რუსულენოვანი უმცირესობები ცხოვრობენ. ისინი თესავენ განხეთქილებას ყველგან, სადაც კრემლს შეუძლია იპოვოს საწვავი თავისი მედიამანქანისთვის.

სამწუხაროდ, ეს მიდგომა მუშაობს. ის რუსულენოვანი ადამიანებიც კი, რომლებიც „არ ყიდულობენ“ პუტინის ნარატივს გამოგონილ „უკრაინელ ნაცისტებზე“, მომზადებულები გეტყვიან, რომ „რაღაცები არასდროსაა ცალსახად აშკარა“. სწორედ ეს სურს პროპაგანდას, რომ მათი დაიჯეროს“, – ვკითხულობთ განცხადებაში, რომელსაც Dron.media ბრიტანული ფონდების მოძიების პლატფორმა gofundme-ზე ავრცელებს.

დამფუძნებლებმა საკუთარი სახსრებით მოახერხეს ვებგვერდის შექმნა და რამდენიმე ჟურნალისტის დაქირავება, თუმცა მათი გეგმები უფრო მასშტაბურია, რადგან სურთ სხვადასხვა ქვეყნის მოცვა. ისინი დახმარებას სთხოვენ ყველას, ვისაც თუნდაც ერთი ევროს გაღება შეუძლია და მიიჩნევს, რომ კრემლის პროპაგანდას პოსტსაბჭოთა თუ მსოფლიოს სხვა ქვეყნებში მცხოვრები რუსულენოვანი მოსახლეობის მოწამვლის შესაძლებლობა არ უნდა მიეცეს.

ახალი რუსულენოვანი გამოცემის თანადამფუძნებელი, გაიგისიზ გელდიევი ამბობს, რომ რუსულენოვანი სატელევიზიო ახალი ამბები თითქმის მთლიანად უკავია რუსეთის პროპაგანდას. გარდა ამისა, რუსულენოვან ონლაინმედიაშიც სწორედ რუსეთთან დაკავშირებული მედიაგამოცემები დომინირებენ, რაც, მისი თქმით, ადგილობრივ კონტექსტს კარგავს:

„ამ მედიების ალტერნატივად ძალიან ცოტა დამოუკიდებელი მედიაა. მათი უმრავლესობაც – „მედუზა“, „მედიაზონა“, „ნოვაია გაზეტა“ – რუსეთიდანაა და სამწუხაროდ, ისინი მხედველობიდან ტოვებენ ლოკალურ კონტექსტს, როდესაც მეზობელი ქვეყნების მოვლენებს აშუქებენ.

რუსულენოვან ადამიანებს სჭირდებათ ინფორმაციის ალტერნატიული წყარო, სადაც ყველას შეუძლია გაიგოს რა ხდება სინამდვილეში. Dron Media-ს მისიაა, იქცეს ასეთ წყაროდ – გააშუქოს მოვლენები ადგილობრივი ჟურნალისტების მეშვეობით, რომლებმაც ყველაზე უკეთ იციან კონტექსტი, რათა მოყვნენ ამბებს ყველაზე დახვეწილი მეთოდით და ახალი ამბები ადამიანებამდე მიიტანონ მაქსიმალურად შესაფერისი გზებით“, – განმარტავს გაიგისიზ გელდიევი.

ვინ არიან Dron.media-ის დამფუძნებლები

 

გაიგისიზ გელდიევი – გამომცემელი 

გაიგისიზმა ბოლო 9 წელი განვითარებად დემოკრატიებში დამოუკიდებელი მედიის განვითარებას მიუძღვნა.

 

 

 

დინა მასლოვა – მთავარი რედაქტორი 

დინა გამოცდილი მედიამენეჯერია. მისი სარედაქტორო კარიერა 18-ზე მეტ წელს მოიცავს. მან ყირგიზეთში შექმნა ფართოდ ცნობილი ვებსაიტები, მათ შორის, Kaktus.media, რომელიც ადგილობრივ ბაზარზე ლიდერია.

 

არტიომ ლისი – მრჩეველთა საბჭოს წევრი 

არტიომი 5 წელზე მეტია, რაც საერთაშორისო მედიაში მუშაობს რედაქტორად; ის ხელმძღვანელობდა BBC-ის ევროპის რეგიონს და ახლა მსოფლიოს გარშემო მედიის განვითარების ორგანიზაციების მრჩეველია.

 

 

სევგილ მუსაიევამრჩეველთა საბჭოს წევრი

სევგილი უკრაინაში წამყვანი ონლაინმედიაგამოცემა  „უკრაინსკა პრავდას“ მთავარი რედაქტორია. ის ჟურნალ Time-ის 2022 წლის 100 ყველაზე გავლენიან ადამიანს შორისაა.

 

სხვა კოლეგები, რომელთა სახელების გასაჯაროებაც უსაფრთხოების მიზეზების გამო არ შეიძლება.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან