რუსეთის საოკუპაციო ჯარები ნიკოლაევის დაბომბვისთვის იყენებენ ატიპიურ იარაღს – S-300 საზენიტო სარაკეტო სისტემებს, სწორედ ამიტომ მათი დარტყმა დიდ ნგრევას იწვევს ქალაქში – განაცხადა უკრაინის სამხრეთ უკრაინის თავდაცვის ძალების ერთობლივი საკოორდინაციო პრესცენტრის ხელმძღვანელმა ნატალია გუმენიუკმა.
მის კომენტარს უკრაინული მედია ავრცელებს.
მისივე თქმით, აღნიშნულ სისტემას აქვს დამატებითი ეფექტი – მაქსიმალურად ანადგურებს ყველაფერს დარტყმის ადგილის ირგვლივ.
სწორედ ამიტომ, როგორც გუმენიუკმა აღნიშნა, ნიკოლაევის რამდენიმე მიკრორაიონი სასტიკად ინგრევა.
17 ივლისს, გამთენიისას, ნიკოლაევში საჰაერო იერიშის შედეგად ათი ძლიერი აფეთქება მოხდა, დაბომბვის შედეგად ორ სამრეწველო საწარმოში ხანძარი გაჩნდა. ინფორმაცია დაშავებულების შესახებ ზუსტდება.
___________
ფოტო: უკრაინის სამაშველო სამსახური. ДСНС України/facebook
