უკრაინულ მედიაში ვრცელდება ინფორმაცია 14 ივლისს, ვინიცაზე თავდასხმის შედეგად დაღუპული კიდევ ერთი ბავშვის ვინაობის შესახებ.
უკრაინის კულტურისა და საინფორმაციო პოლიტიკის სამინისტროს სტრატეგიული კომუნიკაციებისა და ინფორმაციული უსაფრთხოების ცენტრი ტვიტერზე წერს, რომ ვინიცაში სარაკეტო თავდასხმას ემსხვერპლა 8 წლის კირილო პიახინი, რომელიც დედამ ხერსონიდან ვინიცაში წაიყვანა აპრილში, უსაფრთხოებისთვის.
ხერსონის მერის მოვალეობის შემსრულებელმა გალინა ლუგოვამ მედიასთან განაცხადა, რომ 8 წლის ბიჭი აფეთქების დროს მანქანაში, სავარაუდოდ, ბიძასთან ერთად იმყოფებოდა.
„ბანკში წასულ ბებიას ელოდნენ. ბებია გადარჩა, კირილი კი მანქანაში ხანძრის შედეგად გარდაიცვალა. მისი იდენტიფიცირება დნმ-ის ტესტის საშუალებით მოხდება”, – განაცხადა ლუგოვამ.
14 ივლისს, ქალაქ ვინიცაში რუსეთის მიერ ნასროლი ფრთოსანი რაკეტების აფეთქების შედეგად, ბოლო ცნობებით, 24 ადამიანი დაიღუპა, მშვიდობიანი მოსახლეობა. მათგან 23 – აფეთქების ადგილზე, ერთი კი დღეს, 16 ივლისს გარდაიცვალა საავადმყოფოში. დაღუპულებს შორის 3 ბავშვია.
ამავე თემაზე:
4 წლის ლიზა დაიღუპა, დედა დაიჭრა – სარაკეტო თავდასხმა ვინიცაზე
