„უკრაინამ უნდა გაიგოს, რომ ომი არ დასრულებულა. ჩვენ ვცხოვრობთ სერიოზულ, საომარ მდგომარეობაში. ჩვენ უნდა ვისწავლოთ ეკონომიკური რესურსების აღდგენა, გადასახადების გადახდა, საომარ მდგომარეობაში მუშაობა“ – განაცხადა უკრაინის თავდაცვის მინისტრმა, ოლექსეი რეზნიკოვმა „ბიბისისთან“ ინტერვიუში.
ინტერვიუ დღეს, 16 ივლისს გამოქვეყნდა.
ჟურნალისტმა მას ჰკითხა, ასეთი შეფასების ფონზე რამდენად რეალისტურია ზელენსკის განცხადება იმის შესახებ, რომ ომი შესაძლოა წელს დასრულდეს.
რეზნიკოვმა თქვა, რომ ეს რეალისტურია, ერთ შემთხვევაში:
„რეალურია, თუ ჩვენი პარტნიორები განაგრძობენ ჩვენს დახმარებას. უკვე აღარ გვეპარება ეჭვი, რომ ისინი ეხმარებიან გამარჯვებულს და არა დამარცხებულს. ისინი [დასავლეთის ქვეყნები] ხომ ადრე მიიჩნევდნენ, რომ დავმარცხდებოდით, სამ დღეში დავთმობდით კიევს და ამიტომ დიდად არ გვეხმარებოდნენ, მხოლოდ მხარს გვიჭერდნენ.
მაგრამ როდესაც მათ დაიჯერეს, რომ უკრაინის გამარჯვება აბსოლუტურად რეალური იყო, მათ მოისურვეს გამხდარიყვნენ ამ გამარჯვების თანამონაწილეები. ამიტომ, ახლა მნიშვნელოვანია, რომ კონტრშეტევის გეგმები მათთან სინქრონიზდეს, არა მხოლოდ იარაღით, არამედ კიდევ უფრო სერიოზული სანქციებით [რუსეთის წინააღმდეგ]. ეს არის სერიოზული გლობალური პროექტი“.
ანუ ომის დასრულება ამ წლის ბოლომდე არ არის მხოლოდ სიტყვები? – ჰკითხა მას ჟურნალისტმა.
„ეს შესაძლებელია. ამის თქმა შემიძლია. მართალია, იურისტი ვარ, მაგრამ სამხედროებთან მაქვს კომუნიკაცია. თუნდაც სამხედრო თვალსაზრისით, ეს არის აბსოლუტურად რეალისტური გეგმა – მინიმუმ ჩვენი ტერიტორიების გათავისუფლება 2022 წლის 23 თებერვალს არსებულ მდგომარეობამდე“, – განაცხადა რეზნიკოვმა.
______________
ფოტო: EPA-EFE/RONALD WITTEK
