“ჩვენ აღარ გვინდა ქუჩაში ლოცვა” – რას ითხოვს მუსლიმი მრევლი [ფოტო]

დღეს, ლოცვის შემდეგ მუსლიმმა მრევლმა, ბათუმში ახალი მეჩეთის მშენებლობაზე ნებართვის მოსაპოვებლად, კიდევ ერთი მშვიდობიანი აქცია გამართა. 

აქციის მონაწილეებმა, მსვლელობა მოაწყვეს და მთავრობის სახლთან სამი ძირითადი მოთხოვნა გააჟღერეს. ისინი ბათუმში მეჩეთისთვის ტერიტორიის გამოყოფისა და მეჩეთის მშენებლობის ნებართვას, ასევე ქობულეთის ბავშვთა პანსიონის საკითხის დაუყოვნებლივ მოგვარებას და მუსლიმთა უფლებების დაცვას ითხოვენ.

აქცია, ბათუმში ახალი მეჩეთის მშენებლობის საინიციატივო ჯგუფის მიერ იყო ორგანიზებული.

აქციის მონაწილეებს აჭარის მთავრობის თავმჯდომარე არჩილ ხაბაძე გამოეხმაურა და თქვა, რომ  წერილს, რომელსაც 12 000 მოქალაქე აწერს ხელს და მოითხოვს მეჩეთის აშენებას, პასუხი აუცილებლად გაეცემა. „კონსულტაციები მიმდინარეობს, ვმუშაობთ სხვადასხვა წინადადებებზე. მინდა გითხრათ, რომ აქტიურად ჩართულია რელიგიის სააგენტოც, რომელიც პრემიერის აპარატის შემადგენელი ნაწილია. ამ თემასთან დაკავშირებით პრემიერთან კიდევ ერთი შეხვედრა გვექნება. პრემიერი დაინტერესებულია და იცის ყველაფერი, თუ რა გაკეთდა ბოლო სამი წლის მანძილზე ამ მიმართულებით, ასევე 90-იანი წლებიდან თუ რა მოთხოვნები აქვს მუსლიმ მრევლს. შესაბამისად, ჩვენ გადაწყვეტილებას მივიღებთ. წერილს, რომელსაც 12 000 მოქალაქე აწერს ხელს და მოითხოვს მეჩეთის აშენებას, ჩვენ აუცილებლად პასუხს გავცემთ. შესაძლებელია იყოს რამდენიმე ვარიანტიც” – განაცხადა არჩილ ხაბაძემ.