ნეტგაზეთი • RU

ჩაქვში რაგბის მოედნის მოსაწყობად 4,5 მილიონი ლარი დაიხარჯება

ქობულეთის მუნიციპალიტეტის დაბა ჩაქვში, 15 058 კვ.მ მიწის ნაკვეთზე, სადაც ბუნებრივსაფარიანი სტადიონი იყო, ხელოვნურსაფარიან რაგბის მოედანს მოაწყობენ.

სამუშაოების შესყიდვაზე აჭარის პროექტების მართვის კომპანიამ ელექტრონული ტენდერი უკვე გამოაცხადა. სატენდერო თანხა 4 559 943 ლარია.

ტენდერში წინადადებების მიღება დაიწყება 2022 წლის 27 ივლისს და ხუთ დღეში, პირველ აგვისტოს დასრულდება.

პირობის მიხედვით, რაგბის მოედანი, ტენდერში გამარჯვებულთან ხელშეკრულების გაფორმებიდან 15 თვეში უნდა მოეწყოს. ამასთან, „ვადის ცვლილების (გაზრდის) საფუძველს არ წარმოადგენს მეტეოროლოგიური მოვლენები, ასევე, ობიექტის მიმდებარედ მიმდინარე სხვა სამუშაოები.“

პროექტის მიხედვით, ტერიტორიაზე არსებულ შენობას დაანგრევენ. რაგბის მოედნის ფართობი იქნება 7 850 კვ.მ. მთლიან სივრცეზე განთავსდება ტრიბუნები, რომელიც გათვალისწინებულია 349 მაყურებელზე, აქედან 6 ადგილი შშმ პირებისთვის.

ტერიტორიაზე მოეწყობა პარკირება 6 მსუბუქი ავტომობილისათვის. მთავარი შენობის ფართობი კი 895.3 კვ.მ იქნება [მასში განთავსდება: დერეფნები, სან.კვანძი/გასახდელები/სანკვანძი, საწყობი, სამზარეულო, სასადილო, კაბინეტები, სავარჯიშო სივრცე, დამლაგებლისა და დაცვის ოთახები და სხვ.]

პროექტის
„მთავარ შენობას სამი შესასვლელი აქვს გზის მხრიდან და სამი მოედნის მხრიდან. შენობის მოედნის მხარე გასასვლელებით მოხვედრა შესაძლებელია ტერასაზე.

შენობა შესასვლელების საშუალებით დაყოფილია 5 ნაწილად.

პირველ ნაწილში განთავსებულია დაცვის ოთახი, დამლაგებლის ოთახი და სათავსო.

მეორე ნაწილში არის: სასადილო სივრცე, სამზარეულო და სამი სანკვანძი, ერთ-ერთი ადაპტირებულია შშმ პირთათვის.

მესამე ნაწილი მთლიანად მოიცავს სავარჯიშო სივრცეს ტრენაჟორებით.

მეოთხე ნაწილში განთავსებულია: გასახდელები საშხაპეებითა და სანიტარული კვანძებით, ექიმის ოთახი თავისი სანიტარული კვანძით, მსაჯისა და მწვრთნელის ოთახი თავისი სანიტარული კვანძებით, კაბინეტი და ყველასთვის განკუთვნილი 2 სანიტარული კვანძი, ერთ-ერთი ადაპტირებულია შშმ პირთათვის.

მეხუთე ნაწილში ელექტრონული ფარი და კაბინეტებია განლაგებული.

შენობის ძირითადი ნაწილი ვიტრაჟულია. დიდი ვიტრაჟები განთავსებულია სავარჯიშო სივრცესა და სასადილოში. გარდა იმისა, რომ შენობას მოედნის მხრიდან დამცავი ბარიერი უკეთდება, ასევე გადავწყვიტეთ, ვიტრაჟების დასაცავად და უკეთესი ვიზუალის შესაქმნელად ვიტრაჟებზე გაგვეკრა ლითონის ბადე.

შენობის ძირითადი ფერია წითელი. ხუთივე ნაწილი ფასადებზე გამოკვეთილია წითელი კონტურით, რომელსაც მიუყვება წითელი განათება, რაც შენობას უფრო ნათელს და ლამაზს ხდის.“

 

ჩაქვში დღეს არსებული მოედანი / ფოტო პროექტიდან

რაგბის მოედანი ჩაქვში / რენდერი პროექტიდან

ტერიტორია ჩაქვში, სადაც ახალი მოედნის აშენებაა დაგეგმილი, ბათუმი-ქობულეთის მაგისტრალთან მდებარეობს. ეს ტერიტორია ჯერ სახელმწიფოს საკუთრებაში იყო, შემდეგ – ქობულეთის მუნიციპალიტეტის და ამჯერად აჭარის ავტონომიური რესპუბლიკის საკუთრებაშია.

ამ თემაზე:

ჩაქვში ფეხბურთის სტადიონის ადგილას რაგბის მოედანს ააშენებენ

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com