უკრაინის ვიცე-პრემიერმა, დროებით ოკუპირებული ტერიტორიების რეინტეგრაციის მინისტრმა ირინა ვერეშჩუკმა მოუწოდა უკრაინელებს, დატოვონ ზაპოროჟიასა და ხერსონის ოკუპირებული რეგიონები, რათა უკრაინის შეიარაღებულმა ძალებმა საფრთხე არ შეუქმნან სამოქალაქო მოსახლეობას კონტრშეტევის დროს.
ინფორმაციას ukrinform-ი ავრცელებს.
„ეს აუცილებელია იმისათვის, რომ უკრაინის შეიარაღებულმა ძალებმა შეტევითი ოპერაციების დროს საფრთხე არ შეუქმნან მშვიდობიან მოსახლეობას“, – თქვა ვიცე-პრემიერმა. მან მოქალაქეებს მოუწოდა, დატოვონ ეს რეგიონები ნებისმიერი მიმართულებით, თუნდაც ოკუპირებული ყირიმის გავლით.
ვერეშჩუკი უკვე მეორედ აკეთებს მსგავს განცხადებას. ივნისის ბოლოს მან მოუწოდა ხერსონის მცხოვრებლებს დაეტოვებინათ რეგიონი, თუნდაც ყირიმის გავლით. მან ასევე მოუწოდა მოსახლეობას ოკუპანტების მიერ გაცემული „ყალბი“ დოკუმენტების გამოყენებისკენ.
10 ივლისს უკრაინის თავდაცვის მინისტრმა, ოლექსი რეზნიკოვმა ბრიტანულ „თაიმსთან“ ინტერვიუში განაცხადა, რომ პრეზიდენტმა ვოლოდიმირ ზელენსკიმ შეიარაღებულ ძალებს სამხრეთის სანაპირო რეგიონების დეოკუპაცია უბრძანა. მისი თქმით, უკრაინა ამისთვის უკვე აგროვებს მილიონობით სამხედრო ძალას.
ივლისის დასაწყისში, უკრაინის სამხედრო დაზვერვის ხელმძღვანელმა, კირილ ბუდანოვმა განაცხადა, რომ უკრაინის პირველ გამარჯვებას ამ ომში მსოფლიო აგვისტოში ნახავს და ეს იქნება პირველი მნიშვნელოვანი გარდატეხა რუსეთ-უკრაინის ომში.
