დღეს, 14 აპრილს, აჭარის განათლებისა და კულტურის სამინისტროს ორ თანამშრომელს უფლებამოსილება შეუჩერდა. ოფიციალური განცხადებით, ისინი ეჭვმიტანილები არიან ინფორმაციის განადგურებაში. ამის თაობაზე საგანგებო განცხადება გააკეთა მინისტრის მოადგილემ, ლადო მგალობლიშვილმა.
„სამსახურში გამოცხადებისა და გარეშე პირთა შემოსვლასთან დაკავშირებული ყველა ინფორმაცია განადგურებულია. ფაქტი 11 აპრილს დაფიქსირდა. ორ თანამშრომელზეა ეჭვი და მათ შეუჩერდათ უფლებამოსილება“- გვეუბნება სამინისტროს პრესსამსახურის ხელმძღვანელი, თეა ვადაჭკორია.
მისივე ინფორმაციით, გამოძიებას სამინისტროს შიდა აუდიტის დეპარტამენტი აწარმოებს. „ეჭვმიტანილი პირების კავშირი აღნიშნულ საქმესთან დაკავშირებით, ერთი თვის ფარგლებში უნდა დადგინდეს. თუ შიდა აუდიტი ვერ დაადგენს ამ პირების კავშირს ინფორმაციის განადგურებასთან, ის მაინც დადგინდება, რის გამო მოხდა ინფორმაციის წაშლა“- აცხადებენ სამინისტროში.
„ საქმე ეხება სამინისტროს ორ თანამშრომელს, რომელიც შესაძლოა სამსახურებრივად დაკავშირებული იყოს აღნიშნული ინფორმაციის განადგურებასთან. ერთ-ერთმა თანამშრომელმა უარი თქვა ხელმძღვანელი პირის დავალების შესრულებაზე – აღედგინა წაშლილი ინფორმაცია, შეიჭრა მინისტრის მოადგილის კაბინეტში, აგრესიული, არაკორექტული ფორმით შეეცადა თავის მართლებას და პროვოკაციაზე მის წამოგებას, ასევე, ის ახდენდა ფარულ აუდიოჩაწერას ხელმძღვანელის შემდგომი დისკრედიტაციის მიზნით.
მიღებულ იქნა გადაწყვეტილება აღნიშნული თანამშრომლები ჩამოშორდნენ სამუშაოს საქმის წარმოების მიმდინარეობის პროცესში. მიმდინარეობს გამოკვლევა და უახლოეს პერიოდში საქმეში ექსპერტები ჩაერთვებიან“- აცხადებს, მინისტრის მოადგილე, ლადო მგალობლიშვილი.
