მოსკოვში სასამართლომ წინასწარი პატიმრობა მიუსაჯა რუსეთის აკადემიის სარაკეტო და საარტილერიო მეცნიერებების სამეცნიერო ჯგუფის ხელმძღვანელს, შეიარაღების, სამხედრო და სპეციალური ტექნიკის წარმოების მაღალტექნოლოგიური სამეცნიერო ცენტრის დირექტორს, ანდრეი გრუძინსკის.
„6 ივლისს დაკმაყოფილდა გამომძიებლების შუამდგომლობა პატიმრობის შეფარდებაზე,“ – განაცხადეს სასამართლოში. რუსული მედიის ცნობით, გრუძინსკი პატიმრობაში 22 აგვისტომდე დარჩება.
მედია კონფიდენციალურ წყაროებზე დაყრდნობით წერს, რომ მეცნიერი ეჭვმიტანილია თავდაცვის სახელმწიფო შეკვეთის შესრულებისას განსაკუთრებით დიდი ოდენობით თანხის, დაახლოებით მილიონი რუბლის მითვისებაში [დაახლოებით 16 ათასი დოლარი – რედ]. კონკრეტულად, რა შეკვეთას ასრულებდა ცენტრი, მედიას არ დაუზუსტებია.
სარაკეტო და საარტილერიო მეცნიერებების აკადემია რუსეთში შეიარაღების, სამხედრო და სპეციალური ტექნიკის სისტემურ საკითხებზე მუშაობს.
ასევე, რუსული მედიის ცნობით, გუშინ მოსკოვში დააკავეს რუსეთის აკადემიის სამეცნიერო ინფორმაციისა და საზოგადოებრივი მეცნიერებების ინსტიტუტის ხელმძღვანელი იური პივოვაროვი.
მთავარი ფოტო: რაკეტის ნარჩენები/ფოტო: უკრაინის შინაგან საქმეთა სამინისტრო