უკრაინის პირველი დიდი გამარჯვება რუსეთთან ომში აგვისტოში იქნება, ზამთარში კი აქტიური საომარი მოქმედებების ტემპი შენელდება – მიიჩნევს უკრაინის სამხედრო დაზვერვის ხელმძღვანელი, კირილ ბუდანოვი. ინფორმაციას უკრაინული მედია ავრცელებს.
„ზაფხულში, აგვისტოში, ჩვენ უნდა დავინახოთ რაღაც ნაბიჯები ჩვენი მხრიდან. შემდეგ, ზამთრისპირას, ტემპი უნდა შენელდეს. ტემპი [საომარი მოქმედებების] ახლაც შენელებულია, სინამდვილეში. რუსები გამორჩევით ესხმიან თავს ორ ადგილს, მათ არა აქვთ ძალა და შესაძლებლობები ფართომასშტაბიანი შეტევისთვის,“ – აცხადებს ბუდანოვი.
მან ასევე დასძინა, რომ ზაფხულის ბოლოს მსოფლიო ნახავს უკრაინის პირველ გამარჯვებებს, მაგრამ საქმე ეხება პირველ გარდატეხას ომში.
„აგვისტოში ჩვენ ვნახავთ, მთელი მსოფლიო ნახავს უკრაინის პირველ გამარჯვებებს. პირველ გარდატეხას. წლის ბოლოს აქტიური საომარი მოქმედებები საკმაოდ შემცირდება. მაგრამ ეს არ იქნება დასასრული, სწორად უნდა გაიგოთ, რასაც ვამბობ“ – აღნიშნა ბუდანოვმა.
რაც შეეხება საკითხს, როდის და როგორ დასრულდება ომი უკრაინაში, კირილ ბუდანოვმა თქვა, რომ ომი შეიძლება ჩაითვალოს დასრულებულად, როდესაც უკრაინა 1991 წლის საზღვრებს მიაღწევს.
