ნეტგაზეთი • RU

ლისიჩანსკის შემდეგ რუსეთი მთლიანად დონეცკის ოლქზე გადაერთვება – ბრიტანეთის დაზვერვა

ლისიჩანსკის დაკავების შემდეგ, რუსეთი მთელ თავის ძალისხმევას, სავარაუდოდ, მიმართავს დონეცკის ოლქისკენ, რომლის საკმაოდ დიდ ნაწილს კვლავ უკრაინელები აკონტროლებენ. დონბასისთვის ბრძოლა მომავალ კვირებშიც გაგრძელდება – ასეთ პროგნოზს აკეთებს დიდი ბრიტანეთის დაზვერვა 4 ივლისის რელიზში.

უწყება აღნიშნავს, რომ უკრაინის შეიარაღებულმა ძალებმა დატოვეს ლისიჩანსკი, ერთადერთი მსხვილი დასახლებული პუნქტი ლუგანსკის ოლქში, რომელსაც ბოლო დღეებამდე უკრაინა აკონტროლებდა.

დიდი ბრიტანეთის დაზვერვის რელიზში ასევე ნათქვამია, რომ რუსეთი განაგრძობს უკრაინის სოფლის მეურნეობის სექტორისთვის გამანადგურებელი ზიანის მიყენებას:

„ომმა სერიოზულად შეაფერხა ფერმერებისთვის აუცილებელი  თესლისა და სასუქის მიწოდება. ოდესის ბლოკადა კი კვლავაც ხელს უშლის უკრაინული ხორბლის ექსპორტს. ამის გამო, 2022 წელს უკრაინის ექსპორტი, სავარაუდოდ, 2021 წლის საერთო მოცულობის მხოლოდ 35 % იქნება.“

როგორც დაზვერვა მიუთითებს, „კუნძულ ზმეინის დატოვების შემდეგ რუსეთმა განაცხადა, რომ ექსპორტის გაუმჯობესების თვალსაზრისით „ბურთი ახლა უკრაინის მოედანზეა“, თუმცა სინამდვილეში, სწორედ რუსეთის ქმედებები აღრმავეს გლობალურ სასურსათო კრიზისს“.

გაერთიანებული სამეფოს თავდაცვა უკრაინის მოვლენებზე სადაზვერვო ცნობარს ყოველდღიურად აქვეყნებს. 3 ივლისის რელიზში უწყება ხერსონში არსებულ ვითარებაზე წერდა და აღნიშნავდა, რომ იქ რეფერენდუმის ჩატარებას რუსეთი 2022 წლის შემოდგომაზე გეგმავს.

მთავარი ფოტო: საცხოვრებელი კორპუსი ლისიჩანსკსში/ფოტო: ukrinform

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.