ნეტგაზეთი • RU

რუსეთმა დონბასისთვის ბრძოლებში მოხალისე რეზერვისტები ჩართო – ბრიტანეთის დაზვერვა

დიდი ბრიტანეთის დაზვერვის შეფასებით, ერთკვირიანი ინტენსიური შეტევები მიუთითებს, რომ რუსეთი ჩრდილოეთ იზიუმის მიმართულებაზე უპირატესობის დაბრუნებას ცდილობს.

27 ივნისის რელიზში უწყება აღნიშნავს, რომ რუსეთის მცდელობის მიუხედავად, უკრაინის შეიარაღებული ძალები თავდაცვისთვის მოხერხებულად იყენებენ ადგილობრივ ლანდშაფტს და ამ სექტორში, ბრძოლის ხაზზე, კონტროლის შენარჩუნებას ახერხებენ.

„უახლოესი კვირების განმავლობაში, რუსეთის სამხედრო კამპანია, დიდი ალბათობით, კვლავაც მოხალისეთა სარეზერვო ეშელონების იმედად იქნება“, – წერს დიდი ბრიტანეთის დაზვერვა და დასძენს, რომ სხვადასხვა კომპონენტისგან შემდგარი ეს ეშელონები „ნახევარ განაკვეთზე მომუშავე ვეტერანი რეზერვისტებისგანაა დაკომპლექტებული.“

ბრიტანეთის დაზვერვა ვარაუდობს, რომ რუსეთის ხელისუფლება, ამ კატეგორიის მოხალისეებს, რეგულარულ ბრიგადებში დამატებითი ბატალიონების შესაქმნელად იყენებს.

გაერთიანებული სამეფოს თავდაცვა უკრაინაში მიმდინარე საომარ მოქმედებებზე სადაზვერვო ცნობარს ყოველდღიურად აქვეყნებს. გუშინდელ რელიზში უწყება აღნიშნავდა, რომ უკრაინის ძალებმა სევეროდონეცკი დატოვეს, თუმცა დონბასის რეგიონის სრულად დასაკავებლად, რუსეთს კიდევ ბევრი წინააღმდეგობის გადალახვა დასჭირდება.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.