23 ივნისს, ამერიკის შეერთებული შტატების სენატის საგარეო საქმეთა კომიტეტმა მიიღო რეზოლუცია, რომელიც მოუწოდებს სახელმწიფო მდივანს, რუსეთი ტერორიზმის სპონსორი სახელმწიფოების სიაში შეიყვანოს. ინფორმაციას გამოცემა „ბლუმბერგი“ ავრცელებს.
როგორც „ამერიკის ხმა“ წერს, რეზოლუციის ავტორები არიან რესპუბლიკელი დეპუტატი ჯო უილსონი სამხრეთ კაროლინადან და დემოკრატი დეპუტატი ტედ ლიუ კალიფორნიიდან.
„[რუსეთის] ტერორის მმართველობა უნდა შეწყდეს“, – ციტირებს „ამერიკის ხმა“ ჯო უილსონს. ხოლო ტედ ლიუს თქმით, რუსეთის ტერორიზმის სპონსორ სახელმწიფოთა სიაში შეყვანა, უკრაინაში შეჭრისთვის მისი დასჯის მცდელობების გაგრძელება იქნება.
უკრაინაში შეჭრისთვის, რუსეთის ტერორიზმის სპონსორად გამოცხადებით რუსეთი ირანის, სირიის, ჩრდილოეთ კორეისა და კუბის გვერდით აღმოჩნდება. გადაწყვეტილების მისაღებად, აღნიშნულმა ზომამ კონგრესის ორივე პალატა უნდა გაიაროს და გადაეგზავნოს იგი აშშ-ს პრეზიდენტ ჯო ბაიდენს.
როგორც ამერიკის შეერთებული შტატების სახელმწიფო დეპარტამენტის ვებგვერდზე ვკითხულობთ, „ტერორიზმის სპონსორი სახელმწიფოების“ სიაში სახელმწიფო მდივანს შეჰყავს ქვეყნები, რომლებმაც არაერთხელ დაუჭირეს მხარი საერთაშორისო ტერორისტულ აქტებს.
ტერორიზმის სპონსორი სახელმწიფოს სტატუსი ქვეყნისთვის ნიშნავს ფინანსურ სანქციებს, საერთაშორისო დახმარების შეზღუდვას, თავდაცვით ექსპორტის აკრძალვას და სხვა ზომებს.
ოფიციალური კიევის წარმომადგენლებმა 23 აპრილს, ოდესის დაბომბვის შემდეგ, არაერთხელ მოითხოვეს რუსეთის ტერორიზმის სპონსორად დასახლება.
