მთავრობა კურორტების განვითარების ახალ სააგენტოს ქმნის

საქართველოს მთავრობამ ახალი საჯარო სამართლის იურიდიული პირი – კურორტების განვითარების სააგენტო დააფუძნა.

მთავრობის 20 ივნისს დადგენილების მიხედვითთ, სააგენტოს უფლებამოსილება განისაზღვრება დებულებით, რომელსაც ეკონომიკისა და მდგრადი განვითარების მინისტრი დაამტკიცებს; მინისტრი დანიშნავს და გაათავისუფლებს ასევე სააგენტოს დირექტორსაც.

ახალი სააგენტოს დებულება ეკონომიკის მინისტრმა 2022 წლის 15 ივლისამდე უნდა დაამტკიცოს. 15 ივლისიდან დაიწყებს მუშაობას ახალი სააგენტოც.

აღსანიშნავია, რომ სახელმწიფოს მიერ დაფუძნებული იყო შპს „მთის კურორტების მართვის კომპანია“, რომლის წესდებაც და სახელიც 2021 წლის ივნისში მთავრობამ შეცვალა და ის დღეს არის შპს „ემ თი ეი“ [MTA].

ამ კომპანიის მართვაში ახლაც რჩება საქართველოს სამთო-სათხილამურო კურორტები. პარალელურად, „ემ თი ეის“, შეუძლია ნებისმიერი საქმიანობა, რაც კანონმდებლობით არ არის აკრძალული.

აჭარაში ასევე ფუნქციონირებს ტურიზმისა და კურორტების დეპარტამენტი, რომელიც ჭარის მთავრობას ექვემდებარება.

„ბათუმელები“ დაუკავშირდა საქართველოს ეკონომიკის სამინისტროს, თუ რა უფლებამოსილება და ვალდებულებები ექნება კურორტების განვითარების ახალ სააგენტოს?

„კურორტების განვითარების სააგენტოს ძირითადი ამოცანები იქნება ბალნეოლოგიური კურორტების, ასევე მთის კურორტების და სხვა საკურორტო ადგილების განვითარება/ხელშეწყობა; ახალი, პოტენციური კურორტების კვლევა/შესწავლა და შესაბამისი გენგეგმების მომზადება; აღნიშნული ადგილების შესაბამისი ინფრასტრუქტურის მოწყობისათვის სხვადასხვა უწყებებთან თანამშრომლობა და განვითარების ხელშეწყობა; ამ მიმართულებებით ინვესტიციებისა და გრანტების მოზიდვისათვის სხვადასხვა უწყებებთან თანამშრომლობა, პროცესის ხელშეწყობა.“ – მოგვწერეს საქართველოს ეკონომიკის სამინისტროდან.

სამინისტროდან მიღებული პასუხის სრულად სანახავად დააწკაპუნეთ აქ

„ქვეყნის ეკონომიკური განვითარების ერთ-ერთ სტრატეგიულ მიზანს წარმოადგენს საერთაშორისო ვიზიტორთა მოცულობის ზრდა, რასაც მოყვება შემოსავლების ზრდაც. თავის მხრივ, დარგის განვითარებისთვის უმნიშვნელოვანესია კურორტების განვითარება, რომელიც აქტიურად იზიდავს ტურისტს ქვეყანაში.

ქვეყანაში სამასამდე კურორტი და საკურორტო ადგილია, შესაბამისად, კურორტების განვითარებაზე ზრუნვა და ქვეყნის საკურორტო პოტენციალის სრულად ათვისება, საქართველოსთვის არის ეკონომიკის დამატებით სტიმულაციის მნიშვნელოვანი შესაძლებლობა.

მნიშვნელოვანია ასევე, რომ საქართველოში საკურორტო ზონების განვითარება, მათი მდებარეობის გეოგრაფიული არეალიდან გამომდინარე, დეცენტრალიზებულად განავითარებს არამხოლოდ საქართველოს თითქმის ყველა რეგიონულ ცენტრს, არამედ, მცირე ზომის დაბებსა და დასახლებებსაც, სადაც სხვა შემთხვევაში, განვითარების გარკვეული დონის მისაღწევად ქვეყნის ცენტრალური ბიუჯეტიდან დამატებითი საბიუჯეტო სახსრების მობილიზება ხდება საჭირო.

არსებული საკურორტო პოტენციალის ანალიზიდან იკვეთება, რომ განსაკუთრებით აქტიურადაა სამუშაოები გასაწევი ბალნეოლოგიური მიმართულებით, ვინაიდან, ზემოხსენებული სამასამდე საკურორტო ადგილიდან, ნახევარზე მეტი სწორედ ბალნეო და ბალნეოკლიმატური ტიპისაა. აღსანიშნავია ისიც, რომ სამთო და ბალნეოლოგიური კურორტები თავისთავად წარმოადგენს სპორტული და რეკრეაციული ტურიზმის ერთ-ერთ მთავარ საყრდენს და ამ მხრივ საქართველოს დიდი პოტენციალი გააჩნია.

ბოლო სამი წლის განმავლობაში, კოვიდპანდემიასთან დაკავშირებული უდიდესი გამოწვევის მიუხედავად, ტურიზმის სექტორი რჩება ერთ-ერთ პრიორიტეტულ მიმართულებად, რომლის სწრაფ აღდგენას ცდილობს განვითარებული ქვეყნების უმრავლესობა, რადგან ამ სექტორში აკუმულირდება კერძო შემოსავლები, რასაც ეკონომიკური დივერსიფიკაციის თვალსაზრისით სრულიად განსხვავებული დატვირთვა აქვს. შესაბამისად, კურორტების განვითარება, საქართველოს ტურიზმისთვის განახლებული ბიძგის მიცემა და საერთაშორისო ტურისტის არა მხოლოდ რაოდენობრივი, არამედ ხარისხობრივი ზრდის უზრუნველყოფა, იქნება მნიშვნელოვანი ნაბიჯი ქვეყნის მდგრადი განვითარების გზაზე.

ყოველივე ზემოაღნიშნულის გათვალისწინებით და დასახელებული მიზნების ეფექტურად შესრულების უზრუნველსაყოფად, საქართველოს მთავრობამ მიზანშეწონილად მიიჩნია ეკონომიკისა და მდგრადი განვითარების სამინისტროს სისტემაში ახალი საჯარო სამართლის იურიდიული პირის – კურორტების განვითარების სააგენტოს დაფუძნება.“ – მოგვწერეს საქართველოს ეკონომიკის სამინისტროდან.

„ბათუმელებს“ ასევე აინტერესებდა დარჩება თუ არა მთის კურორტები მართვაში სახელმწიფო კომპანია „ემ თი ეის“, ან, გადაეცემა თუ არა აჭარის კურორტების [და კონკრეტულად რომელის] მართვა ახალ სააგენტოს? ასევე, რამდენი შტატი იქნება ახალ სააგენტოში, რა თანხა არის გამოყოფილი [ან გამოიყოფა] ბიუჯეტიდან და სხვა, თუმცა, ამ ეტაპზე სამინისტროდან პასუხი ვერ მივიღეთ.

კონკრეტული დეტალები იმ დებულებით განისაზღვრება, რომელსაც ეკონომიკის მინისტრი დაამტკიცებს. ახალი სააგენტოს სახელმწიფო კონტროლს კი, ეკონომიკის სამინისტრო განახორციელებს.

მთავარი ფოტო: კურორტი ბახმარო, 2019 წელი

ასევე:

როგორ იცვლებოდა მასწავლებლის ანაზღაურება წლების მიხედვით საქართველოში – კვლევა

რა შემთხვევაში დააფინანსებს სახელმწიფო სტუდენტს სრულად – „ოცნება“ დაპირებას ცვლის

როგორ ხუმრობს ქრისტეზე „სიწმინდეების მცველი“ ბათუმის თეატრის დირექტორი

Thai Vlogger Found Dead in Tbilisi: Family Rejects Suicide Theory, Seeks Answers

ზურაბ მენთეშაშვილმა 9-თვიანი პატიმრობის შემდეგ ციხე დატოვა – ის „გზის მეორედ გადაკეტვის“ გამო იყო დაკავებული

„მხოლოდ ფუფუნებაზე ზრუნავენ“ – პოლიტიკოსი უმაღლესი საბჭოს 4 ახალი ჯიპის შესყიდვაზე