რუსეთის შეიარაღებული ძალები აგრძელებენ ძალების მობილიზებას აღმოსავლეთ უკრაინაში, ამიტომ უკრაინის ხელისუფლება ადგილობრივებს სახიფათო დასახლებების დატოვებას ურჩევს – ამის შესახებ უკრაინულ „24 კანალთან“ განაცხადა ლუგანსკის რეგიონული სამხედრო ადმინისტრაციის ხელმძღვანელმა სერგეი გაიდაიმ.
გაიდაის თქმით, რუს დამპყრობლებს მნიშვნელოვანი უპირატესობა აქვთ არტილერიის, მძიმე ტექნიკისა და პერსონალის მხრივ, თუმცა, მისივე თქმით, უკრაინის შეიარაღებულ ძალებს სწორი ტაქტიკა აქვთ არჩეული.
„რუსები აგროვებენ ბოლო რეზერვებს, უახლოეს მომავალში ჩვენ მათ შევაჩერებთ,“ – თქვა გაიდაიმ.
მან აღნიშნა, რომ ახლა არის შესაძლებლობა გაიყვანონ მშვიდობიანი მოქალაქეები რუსეთის მიერ დროებით ოკუპირებული ლუგანსკის რეგიონის ზოგიერთი ტერიტორიიდან. მისი თქმით, ყოველდღიურად შესაძლებელია 15-დან 70-მდე ადგილობრივი მოსახლის ევაკუაცია.
გაიდაიმ, რომელიც ყოველდღიურად აახლებს ინფორმაციას აღმოსავლეთ უკრაინაში მიმდინარე ბრძოლების შესახებ, დღეს, 23 ივნისს, დილით განაცხადა, რომ რუსულმა მხარემ ყველა რეზერვი შეაგროვა და გაგზავნა სევეროდონეცკისა და გოლდენ-ტოშკოვკას მიმართულებით შეტევაზე. სევეროდონეცკი თითქმის მთლიანად დაიკავა რუსულმა არმიამ, უკრაინელები იბრძვიან ქალაქის ინდუსტრიულ ზონაში და „აზოტის“ ქარხნის ტერიტორიაზე.
ქალაქ სევეროდენცკსა და მის მიმდებარე სოფლებსა და ქალაქებში ერთი თვეა ინტენსიური ბრძოლა მიმდინარეობს. მიუხედავად დიდი მობილიზებისა, რუსული მხარე ჯერჯერობით ამ ტერიტორიას სრულად ვერ აკონტროლებს.
