ნეტგაზეთი • RU

15,9 მილიონი ლარი ბათუმის მე-16 საჯარო სკოლის ახალი შენობისთვის – ტენდერი

ბათუმში მე-16 საჯარო სკოლის ადგილას ახალი შენობის ასაშენებლად 15 969 157 ლარია გამოყოფილი ბიუჯეტიდან. აჭარის განათლების სამინისტრომ ტენდერი უკვე გამოაცხადა.

სკოლის ახალი შენობის მშენებლობა ტენდერში გამარჯვებულთან ხელშეკრულების დადებიდან 3 წლის განმავლობაში [36 თვეში] უნდა დასრულდეს. ტენდერში წინადადებების მიღება კი, 2022 წლის 17 ივლისს დაიწყება და ხუთ დღეში, 22 ივლისს დასრულდება.

ტენდერს თან ახლავს პროექტი, რომლის მიხედვით უნდა აშენდეს 3-სართულიანი შენობა, გათვლილი 1000 მოსწავლეზე [40 საკლასო ოთახი] ერთ ცვლაში.

„საკლასო ოთახების გარდა, შენობაში განთავსდება ლაბორატორიები, ბიბლიოთეკა, კომპიუტერული ოთახი, სააქტო დარბაზი 300 მაყურებელზე, ღია და დახურული სპორტული მოედნები, ტრიბუნებით. შენობა იქნება ადაპტირებული, მოეწყობა ლიფტი. ტერიტორია სრულად კეთილმოეწყობა.“ – აცხადებს სამინისტრო.

მთავარი ფოტო: სკოლის ახალი შენობა / რენდერი / პროექტიდან

ბათუმის მე-16 საჯარო სკოლა 2021 წლის აპრილში იმდენად დაიბზარა, რომ შეფასდა, როგორც ბავშვებისთვის სახიფათო. მას შემდეგ ამ სკოლის მოსწავლეებისთვის საგაკვეთილო პროცესი მე-10 საჯარო სკოლაში ტარდება.

ამავე თემაზე:

მე-16 სკოლის მშენებლობაზე ტენდერი მალე გამოცხადდება – სამინისტრო

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com