უკრაინის საერთაშორისო თავდაცვის ლეგიონში მსოფლიოს 55 ქვეყნიდან იბრძვიან მოხალისეები. ამის შესახებ დღეს, 13 ივნისს განაცხადა ბრიფინგზე უკრაინის საერთაშორისო თავდაცვის ლეგიონის წარმომადგენელმა დემიენ მაგრუმ.
უცხოურ ლეგიონში უმრავლესობა შეერთებული შტატებიდან და დიდი ბრიტანეთიდანაა, გარდა ამისა, ლეგიონში ბევრი მებრძოლია პოლონეთიდან, კანადიდან, ბალტიისპირეთის ქვეყნებიდან და სკანდინავიის ქვეყნებიდან – კერძოდ, ფინეთიდან.
ასევე, არიან მებრძოლები ბრაზილიიდან, სამხრეთ კორეიდან და ავსტრალიიდან.
მაგრუმ აღნიშნა, რომ საერთაშორისო ლეგიონი არის უკრაინის შეიარაღებული ძალების ნაწილი და ფინანსდება თავდაცვის ბიუჯეტიდან. ეს ეხება ცხოვრების ყველა ხარჯს, მებრძოლების ხელფასს, იარაღსა და საბრძოლო მასალას.
„ჩვენ გვაქვს დამატებითი საქველმოქმედო სახსრები კერძო დონორებისგან. ვხარჯავთ სხვადასხვა პლატფორმებზე შეგროვებულ თანხებს ექსკლუზიურად ჩვენი მებრძოლების აღჭურვილობაზე, რომელიც არ შედის უკრაინის შეიარაღებული ძალების მიერ გაცემულ სტანდარტულ სამხედრო პაკეტში და საჭიროა ბრძოლის ველზე, მაგრამ არ ფინანსდება უკრაინის სახელმწიფოს მიერ“- განაცხადა ლეგიონის სპიკერმა.
27 თებერვალს, უკრაინაზე რუსეთის თავდასხმის მესამე დღეს, უკრაინის პრეზიდენტმა ვოლოდიმირ ზელენსკიმ მოუწოდა უცხო ქვეყნების მოქალაქეებს, შეერთებოდნენ უკრაინის თავდაცვის ძალებს. ასე შეიქმნა უკრაინის ტერიტორიული თავდაცვის საერთაშორისო ლეგიონი.
__________
ფოტოზე: დემიენ მაგრუ
ამავე თემაზე:
„მინდოდა ჩემი სისხლი და ცრემლები გამეღო“ – უცხოელები, რომლებიც უკრაინისთვის იბრძვიან
