„აზოვსტალის“ დამცველთა ოჯახებმა დაადასტურეს, რომ მარიუპოლში დაღუპული სამხედროების ცხედრები რუსეთმა კიევს გადასცა.
„კიევში უკვე ჩამოასვენეს „აზოვსტალის“ დაღუპული მებრძოლები. მათ „აზოვი“ დახვდა და ექიმებთან ერთად პირველადი დათვალიერება და აღწერა ჩაატარა. უნდა აღინიშნოს, რომ დაღუპულთა მესამედი „აზოვის“ მებრძოლებია, ჯერ ირკვევა, თუ რომელ სამხედრო დანაყოფებში მსახურობდნენ სხვა დაღუპულები. სამუშაოების ბოლომდე დასასრულებლად, სასამართლო-სამედიცინო ექსპერტებს შესაძლოა, დაახლოებით სამი თვე დასჭირდეთ,“ – ნათქვამია „აზოვსტალის“ დამცველთა ოჯახების ასოციაციის განცხადებაში, რომელიც ტელეგრამზე გამოქვეყნდა.
ოჯახებს მალე დაღუპულთა ამოსაცნობად გამოიძახებენ.
„აზოვის“ პოლკის პრესმდივნის, ანა გოლოვკოს თქმით, კიევისთვის გადაცემული 160-ვე ცხედარი, რომლებიც დედაქალაქში გადაასვენეს, „აზოვსტალში“ დაღუპული მებრძოლებისაა, მათგან 52 – „აზოველია“.
4 ივნისს ცნობილი გახდა, რომ უკრაინამ და რუსეთმა პირველად გაცვალეს ცხედრები, ფორმულით „160/160-ზე.“ უკრაინული მედიის ცნობით, გრძელდება მოლაპარაკებები სხვა დაღუპული სამხედროების უკრაინისთვის გადაცემაზე.
გუშინ პრეზიდენტმა ზელენსკიმ განაცხადა, რომ რუსეთის ტყვეობაში „აზოვსტალის“ 2 500-ზე მეტი დამცველი იმყოფება.
24-ე არხისთვის მიცემულ ინტერვიუში ტყვეების მდგომარეობაზე ისაუბრა უკრაინის უსაფრთხოებისა და თავდაცვის საბჭოს მდივანმა ოლექსი დანილოვმა.
„დღეს ისინი კომფორტულ პირობებში არ იმყოფებიან, ეს უნდა ვაღიაროთ, მაგრამ არიან ცოცხლები და ჯანმრთელები, აქვთ წყალი და საკვები. უნდა გვესმოდეს, რომ ჩვენი მებრძოლები მტრის ხელში არიან. ჩვენ იმედი გვაქვს, რომ ადრე თუ გვიან ისინი ჩვენს ქვეყანაში დაბრუნდებიან. უკრაინა ყველაფერს გააკეთებს, რაც მასზეა დამოკიდებული. ბევრი ინფორმაცია ახლა გასაიდუმლოებულია, რათა ეს პროცესი არ ჩავარდეს“, – განაცხადა მან.
______
ალყაშემორტყმული ქარხანა „აზოვსტალი“ მარიუპოლში ერთადერთი ადგილი იყო, რომლის აღებაც რუსეთის შეიარაღებულმა ძალებმა ვერ შეძლეს. მანამდე, ჯერ კიდევ მარტის დასაწყისში, რუსეთმა თითქმის მთლიანად დაიკავა ქალაქი და ინტენსიურად ბომბავდა როგორც მეტალურგიული ქარხნის ტერიტორიას, ისე დასახლებულ პუნქტებს.
მაისის დასაწყისში, უკრაინის ხელისუფლებამ გაეროს დახმარებით „აზოვსტალის“ ტერიტორიაზე შეფარებული მშვიდობიანი მოქალაქეების გამოყვანა მოახერხა. 16-17 მაისს კი ქარხანა მისმა დამცველმა მებრძოლებმაც დატოვეს, ისინი ახლა რუსეთის ტერიტორიაზე იმყოფებიან.
