ხერსონის ოლქის სოფელ ვისოკოპოლიეში რუსმა სამხედრომ ცოლ-ქმარს თავიანთი სახლის ეზოში ესროლა, რის შედეგადაც ისინი დაიღუპნენ. ინფორმაციას ამის შესახებ ხერსონის საოლქო პროკურატურა ავრცელებს.
ხერსონის პროკურატურის ინფორმაციით, შემთხვევა პირველ ივნისს მოხდა. ცეცხლსასროლი ჭრილობების შედეგად კაცი და ქალი ადგილზე გარდაიცვალა.
პროკურატურა აცხადებს, რომ მსგავსი ქმედება ეწინააღმდეგება საერთაშორისო ჰუმანიტარული სამართლის ნორმებს, რომლებიც კრძალავს მშვიდობიან მოსახლეობაზე თავდასხმას.
ბოლო დღეებში უკრაინის შეიარაღებულმა ძალებმა გააძლიერეს კონტრშეტევები ხერსონის რეგიონში. 30 მაისს უკრაინის გენერალურმა შტაბმა გაავრცელა ინფორმაცია, რომ უკრაინის სამხედრო ნაწილების წარმატებული შეტევის დროს დამპყრობლებმა განიცადეს ზარალი და უკან დაიხიეს ხერსონის ოლქის ნიკოლაევკას დასახლებიდან.
______________
ფოტოზე: რუსი ჯარისკაცები ხერსონში. ფოტო: EPA-EFE/SERGEI ILNITSKY
