მთავარი,სიახლეები

უკრაინის ომში მომდევნო კვირები გადამწყვეტი იქნება – აშშ-ის გენერალი

31.05.2022 • 4768
უკრაინის ომში მომდევნო კვირები გადამწყვეტი იქნება – აშშ-ის გენერალი

უკრაინაში ვითარება შესაძლოა კიდევ უფრო დაიძაბოს – ამის შესახებ FOX News-ის ეთერში აშშ-ის შეიარაღებული ძალების გაერთიანებული შტაბების კომიტეტის მეთაურმა, გენერალმა მარკ მილიმ განაცხადა.

მისი თქმით, აშშ-ში ყველაფერს აკეთებენ ესკალაციის თავიდან ასაცილებლად.

„მიმაჩნია, რომ ყოველთვის არსებობს ესკალაციის შესაძლებლობა. მნიშვნელოვანია, რომ ამის შანსები შევაფასოთ. ამას ვაკეთებთ კიდეც. სწორედ ამიტომაც მინისტრი ოსტინი ელაპარაკება თავის კოლეგებს, რუს კოლეგებს, რათა არ დავუშვათ, ეს ომი გადაიზარდოს რაიმე კიდევ უფრო საშინელში, ვიდრე ახლაა“.

მარკ მილი დარწმუნებულია, რომ მომდევნო კვირები გადამწყვეტი იქნება.

„ახლა დონბასში მნიშვნელოვანი ბრძოლები მიმდინარეობს უკრაინისა და რუსეთის ძალებს შორის. დიდწილად, სწორედ უახლოესი კვირები განსაზღვრავს იმას, თუ როგორ განვითარდება მოვლენები მომავალში“.

გენერლის აზრით, დონბასის ბრძოლების შედეგი შეიძლება აღმოჩნდეს პოზიციურ ომზე გადასვლა ან რომელიმე მხარის გამარჯვება. ის მიიჩნევს, რომ მნიშვნელოვანი დანაკარგების ფონზე, ახლა საუკეთესო გამოსავალი სამშვიდობო მოლაპარაკებებია.

„ვვარაუდობ, რომ მოლაპარაკებები ლოგიკური არჩევანი იქნებოდა“, – ამბობს აშშ-ის შეიარაღებული ძალების გაერთიანებული შტაბის კომიტეტის მეთაური. თუმცა, მისი თქმით, მხარეები ამ გადაწყვეტილებამდე თავად უნდა მივიდნენ. – „წინააღმდეგ შემთხვევაში, უკრაინაში მიმდინარე ომის შედეგი შეიძლება იყოს რომელიმე მხარის გამარჯვება ან ჩიხი“.

გენერალ მილის აზრით, ჯერჯერობით კვლავ ადრეა იმაზე ლაპარაკი, როგორ შეიძლება დამთავრდეს ომი უკრაინაში, თუმცა „როგორ დამთავრდება ყველაფერი, ეს პრეზიდენტებმა ზელენსკიმ და პუტინმა უნდა გადაწყვიტონ.“

გუშინ პრეზიდენტის ოფისის ხელმძღვანელის მრჩეველმა, ოლექსეი არესტოვიჩმა განაცხადა, რომ რუსეთთან ომში უკრაინის გამარჯვება „ნაკლებად სავარაუდო“ იქნება, თუ აშშ უკრაინას შორსმოქმედ არტილერიას არ მიაწვდის.

მთავარი ფოტო: გენერალი მარკ მილი/აშშ-ის თავდაცვის დეპარტამენტის ფოტო

გადაბეჭდვის წესი


ასევე: