ნეტგაზეთი • RU

ფოთის მეტალურგიულ ქარხანაში გაზის ბალონი აფეთქდა

დღეს, 27 მაისს, ფოთის მეტალურგიულ ქარხანაში, შპს „მოულდს ენდ მეტალს ჯორჯიაში“ აფეთქება იყო, რამაც გამოიწვია ძლიერი დაკვამლიანება.

როგორც ფოთის მერიაში „ბათუმელებს“ უთხრეს, აფეთქების შედეგად არავის დაშავებულა.

ფოთის მერიის ინფორმაციით, აფეთქება სავარაუდოდ ბალონმა გამოიწვია, თუმცა დეტალები ამ დროისთვის დაზუსტებული არ არის.

„ბათუმელები“ შპს „მოულდს ენდ მეტალს ჯორჯიას“ ხელმძღვანელს, გიორგი ნანავასაც ესაუბრა. მისი თქმით, ღუმელში შემთხვევით მოხვდა გაზის დაუჭრელი ბალონი, რომელიც ტემპერატურაზე აფეთქდა.

„ცეცხლი არ გაჩენილა, კვამლი რაც ჩანდა, ეს იყო საწარმოო მტვერი, რადგან შემთხვევით ღუმელში მოხვდა დაუჭრელი გაზის ბალონი. როგორც წესი დაჭრილი ჯართი იყრება ღუმელში, მაგრამ ეს ერთი ბალონი დაუჭრელი შეჰყოლია, სამწუხაროდ“ – ამბობს გიორგი ნანავა.

მისი თქმით, აფეთქების შედეგად არავის დაშავებულა. „არ უნდა მომხდარიყო ნამდვილად, მაგრამ მოხდა ასეთი შემთხვევა, ამიტომ გავაუმჯობესებთ ტექნიკურ ზედამხედველობას“ – გვითხრა მან.

____________

ფოტოზე: კადრი სოციალურ ქსელებში გავრცელებული ვიდეომასალიდან

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com