ნეტგაზეთი • RU

ბათუმში „ბლექსის“ ადგილზე 7,4 მილიონ ლარად ახალ საჯარო სკოლას ააშენებენ

ბათუმში, დემეტრე თავდადებულის ქუჩა N 61-ში ახალი საჯარო სკოლის შენობას ააშენებენ.

ყოფილი კოლეჯ „ბლექსის“ ადგილზე [ჭავჭავაძისა და თავდადებულის ქუჩების კვეთაში] ახალი სკოლის მშენებლობაზე აჭარის განათლების სამინისტრომ ტენდერი უკვე გამოაცხადა. სატენდერო თანხა 7 418 283 ლარია.

ახალი სკოლა / რენდერი პროექტიდან

„საპროექტო დოკუმენტაცია კონკურსის წესით შეირჩა, რომლის მიხედვითაც უნდა აშენდეს სამსართულიანი, სრულიად ადაპტირებული სკოლის შენობა, რომელიც გათვლილია დაახლოებით 1 400 მოსწავლეზე (ორ ცვლაში). შენობაში, საკლასო ოთახების გარდა, განთავსდება სპორტული და სააქტო დარბაზები, ბიბლიოთეკა, სხვადასხვა დანიშნულების სათავსები. მოეწყობა ღია მოედანი.“ – აცხადებს სამინისტრო.

ტენდერში წინადადებების მიღება 2022 წლის 3 ივნისს დაიწყება და ხუთ დღეში, 8 ივნისს დასრულდება. სკოლის მშენებლობა კი, გამარჯვებულთან ხელშეკრულების გაფორმებიდან 30 თვეში უნდა დასრულდეს.

კოლეჯ „ბლექსის“ ყოფილი შენობა ბათუმში, რომლის ადგილზეც ახალი საჯარო სკოლა აშენდება

ფოტომონტაჟი პროექტიდან


კოლეჯ „ბლექსის“ ახალი შენობა უნდა აშენდეს ბათუმში, სვიშევსკის ქ N1-ში. მშენებლობაზე საგანმანათლებლო და სამეცნიერო ინფრასტრუქტურის განვითარების სააგენტოს ტენდერი 17 534 630 ლარით აქვს გამოცხადებული. ამ ტენდერში წინადადებების მიღება დღეს, 16 მაისს დასრულდა.

შესყიდვების პორტალის მიხედვით სააგენტოს მომსახურებას შპს „დაგი“ 17 179 630 ლარად სთავაზობს. ტენდერი შერჩევა/შეფასების ეტაპზეა.

ამ ტენდერის შესახებ ვრცლად:

კოლეჯ „ბლექსის“ მშენებლობის თანხა 1,1 მილიონით გაიზარდა და 17,5 მილიონია – ტენდერი

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com