მთავარი,სიახლეები

ბათუმში მიუსაფარი ძაღლი ტბაში წიხლით ჩააგდეს – პოლიციას განცხადებით მიმართეს

16.05.2022 • 9798
ბათუმში მიუსაფარი ძაღლი ტბაში წიხლით ჩააგდეს – პოლიციას განცხადებით მიმართეს

დღეს, 16 მაისს, სოციალურ ქსელებში გავრცელდა ვიდეო, რომელზეც ცხოველისადმი სისასტიკეა ასახული.

ვიდეო ბათუმის ცენტრალურ პარკშია გადაღებული. კადრებში ჩანს, როგორ უახლოვდება 2 ბიჭი ტბის ნაპირას მყოფ მიუსაფარ ძაღლს და ერთ-ერთი მათგანი წიხლის კვრით აგდებს ძაღლს ტბაში. ამის შემდეგ ახალგაზრდები იცინიან და გზას აგრძელებენ.

ვიდეოს გავრცელების შემდეგ შინაგან საქმეთა სამინისტროს მიმართეს ბათუმელმა ცხოველების უფლებათა დამცველებმა. მათ განცხადება ბათუმის მთავარ სამმართველოში შეიტანეს.

ცხოველის წამება ან მისდამი სასტიკი მოპყრობა საქართველოში სისხლის სამართლის კოდექსით ისჯება საზოგადოებისათვის სასარგებლო შრომით ვადით ას ოციდან ორას ორმოც საათამდე, შინაპატიმრობით ვადით ექვსი თვიდან ერთ წლამდე, ჯარიმით ან თავისუფლების აღკვეთით ვადით ერთ წლამდე.

შს სამინისტროს პრესსამსახურში გვითხრეს, რომ გვაცნობებენ გამოძიების დაწყების შემთხვევაში.

ბათუმელი ცხოველთა მოყვარულები ცდილობენ გაარკვიონ, გადარჩა თუ არა ძაღლი ტბაში ჩაგდების შემდეგ.

კანონი, რომელიც ცხოველის წამებას და მისდამი სასტიკ მოპყრობას კრძალავს, საქართველოში ეფექტურად არ მუშაობს, თუმცა უკვე არსებობს პრეცედენტი – 2021 წლის ივლისში ზუგდიდის რაიონულმა სასამართლომ 1 წლით თავისუფლების აღკვეთა მიუსაჯა კაცს, რომელმაც მიუსაფარი ძაღლი მოკლა.

_______________

ფოტოზე: კადრები ვიდეოდან

გადაბეჭდვის წესი


ასევე: