ქალაქის შემოსასვლელში, ოდისეი დიმიტრიადის ქუჩაზე, სანაპიროს გასწვრივ მოწყობილი ღამის დეკორატიული გარეგანათების სისტემა არ მუშაობს. აქ ელექტროკაბელები მოიპარეს. კონკრეტულად როდის აღადგენენ განათებას, მერიის სამსახურში არ გვიპასუხეს. სანაპიროს გასწვრივ არაერთ ადგილზე დაზიანებულია ქვის მოაჯირიც.
„თამარის დასახლების მიმდებარე ზღვისპირა განათება დეკემბერში შეცვალეს და გააკეთეს. აგერ ერთ თვეზე მეტია აღარ ანათებს და ვეღარც გაანათებს, იმიტომ რომ „ოქროს თევზიდან“ „რივიერამდე“ მონაკვეთში მთლიანი კაბელი აღარაა, მოიპარეს, როგორც ჩანს, და არის ახლა ასე ჩაბნელებული. ასევე ფილები არის დაზიანებული“, – მოგვწერა დღეს ერთ-ერთმა მოქალაქემ.
ბათუმის მერიის საქალაქო ინფრასტრუქტურისა და კეთილმოწყობის სამმართველოში „ბათუმელებს“ დაუდასტურეს, რომ აღნიშნულ პერიმეტრზე დეკორატიული გარეგანათების კაბელები მოპარულია.
„ფაქტთან დაკავშირებით ჩვენ მივმართეთ სამართალდამცავ უწყებას, რომ დაიწყოს გამოძიება. ამ ეტაპისთვის ველოდებით გამოძიების შედეგებს“, – გვითხრეს მერიაში.
რას აპირებს სამმართველო გამოძიების დასრულებამდე? ანუ, აღადგენენ თუ არა გარეგანათებას და როდის?
ამ კითხვაზე პასუხის მისაღებად ინფრასტრუქტურის სამმართველოში გვითხრეს, რომ ოფიციალური წერილით მივმართოთ და პასუხსაც „ოფიციალურად, წერილობით მოგვაწვდიან“.
სანაპიროს გასწვრივ მდებარე ქვის მოაჯირს რაც შეეხება, ის არაერთ ადგილზეა დაზიანებული [დატეხილი და ჩამოცვენილია ქვის ფილები].
ბათუმის მერიის მუნიციპალური სერვისების სააგენტოში „ბათუმელებს“ უთხრეს, რომ „ეს ადგილი მონიშნული აქვთ და უახლოეს პერიოდში აღადგენენ“.
როდის იქნება „უახლოესი პერიოდი“, ვერც ამ სააგენტოში დაგვიკონკრეტეს – „შესაბამისი სამუშაოები ეტაპობრივად ხორციელდება“.