ნეტგაზეთი • RU

ოკუპანტებმა „აზოვსტალს“ ფოსფორის ბომბები დაუშინეს – „ჯოჯოხეთი ჩამოვიდა მიწაზე“

უკრაინული მედიის ინფორმაციით, რუსი ოკუპანტები აგრძელებენ ალყაში მოქცეულ „აზოვსტალის“ ქარხანაზე იერიშს ყველა არსებული რესურსით.

„მარიუპოლი. აზოვსტალი. ისევ – ციდან, ზღვიდან, მიწიდან. გუშინ ოკუპანტებმა პირველად გამოიყენეს აალებადი ან ფოსფორის ბომბები მარიუპოლის მცველების წინააღმდეგ (დასკვნები სპეციალისტებმა გააკეთონ)“, – წერს უკრაინული გამოცემა „უნიანი“ მარიუპოლის მერის მრჩეველ პეტრ ანდრიუშჩენკოვზე დაყრდნობით, რომელიც მტკიცებულების სახით ვიდეოსაც აქვეყნებს.

ანდრიუშჩენკოვის თქმით, თავად ოკუპანტები ამბობენ, რომ გამოიყენეს აალებადი ყუმბარები 9М22С, რომელიც შეიცავს თერმიტულ ფენებს. წვის ტემპერატურა დაახლოებით 2-2,5 ათასი ცელსიუსია. ხანძრის შეჩერება თითქმის შეუძლებელია.

„ჯოჯოხეთი ჩამოვიდა დედამიწაზე. აზოვსტალში. წარმოუდგენელია, როგორ უძლებენ ჩვენი დამცველები“, – დასძინა ანდრიუშჩენკოვმა.

„უნიანის“ ინფორმაციით, „აზოვსტალის“ მეტალურგიული ქარხნიდან მშვიდობიანი მოსახლეობის ევაკუაციის შემდეგ რუსული ჯარები ცდილობენ ხელში ჩაიგდონ ქარხანა, რომელსაც უკრაინელი ჯარისკაცები იცავენ. ოკუპანტები ქარხანას უტევენ სარაკეტო-ბომბდამშენებით, არტილერიითა და ტანკებით.

პრეზიდენტ ვოლოდიმირ ზელენსკის თქმით, „აზოვსტალში“ მყოფი უკრაინელი მებრძოლების გადარჩენის პროცესში ჩაერთნენ გავლენიანი შუამავლები და სახელმწიფოები. უკრაინის შეიარაღებული ძალების გენერალური შტაბი ამბობს, რომ სამხედრო ოპერაციით ქარხნის გათავისუფლება უდიდეს ძალისხმევას და დიდძალ ჯარს მოითხოვს.

11 მაისს ვიცე-პრემიერმა ვერეშჩუკმა განაცხადა, რომ აზოვსტალის ტერიტორიაზე შესაძლოა კიდევ ათასი მებრძოლი იმყოფებოდეს, რომელთაგან ნახევარი მძიმედ არის დაჭრილი. 12 მაისს მან განაცხადა, რომ ამჟამად მხოლოდ 38 მძიმედ დაჭრილი მებრძოლის გათავისუფლებაზე მიდის მოლაპარაკება.

13 მაისს ზელენსკიმ განაცხადა, რომ უკრაინა რუსეთს სთავაზობდა სხვადასხვა მექანიზმს „აზოვსტალის“ ქარხნიდან უკრაინული მებრძოლების გამოსაყვანად და რუსეთის პრეზიდენტ ვლადიმირ პუტინთან ამის შესახებ ფინეთის პრეზიდენტი ილაპარაკებს.

საუბარია ცოცხლების გადარჩენასა და დაღუპულების ცხედრების გამოტანაზე.

უკრაინის პროკურატურამ გამოძიება დაიწყო აზოვსტალში მარიუპოლის მცველების წინააღმდეგ აკრძალული ჭურვების გამოყენების გამო.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან