ნეტგაზეთი • RU

„აზოვსტალში“ წყალს გათბობის სისტემიდან იყენებენ, დაჭრილები იატაკზე წვანან – დენისოვა

600-მდე დაჭრილი უკრაინელი ჯარისკაცი მარიუპოლში, „აზოვსტალის“ ქარხანაში მძიმე მდგომარეობაში რჩება – წერს უკრაინის სახალხო დამცველი, ლუდმილა დენისოვა ფეისბუქზე.

„ერთ ოთახში რამდენიმე ათეული ორსართულიანი საწოლია, სხვა დაშავებულები სრულ ანტისანიტარიულ პირობებში, იატაკზე წვანან. წამლები აღარ არის. საკვები და წყალი პრაქტიკულად არ არის. საავადმყოფო იყენებს წყალს, რომელიც მოდის გათბობის სისტემიდან“ – იუწყება დენისოვა.

მისივე განცხადებით, „აზოვსტალში“ ბევრი დაჭრილი დაჭრილი იღუპება, რადგან მათ ვეღარ უწევენ სათანადო სამედიცინო დახმარებას. პარალელურად „აზოვსტალი“ იბომბება ჰაერიდან, მძიმე არტილერიითა და ტანკებით.

„რუსეთი არღვევს დაჭრილ სამხედრო მოსამსახურეებისთვის ჰააგის და ჟენევის კონვენციებით გარანტირებულ სიცოცხლისა და სამედიცინო დახმარების უფლებებს. რუსეთი უხეშად არღვევს მოქმედ ჯარებში დაჭრილთა და ავადმყოფთა ბედის გაუმჯობესების შესახებ კონვენციის მე-12 მუხლს.

მივმართავ უკრაინაში რუსეთის სამხედრო შეჭრის დროს ადამიანის უფლებათა დარღვევის გამოძიების გაეროს კომისიას, განიხილოს ადამიანის უფლებების დარღვევის ეს ფაქტები.

მოვუწოდებ გაეროს და წითელი ჯვრის საერთაშორისო კომიტეტს, გადაარჩინოს ჩვენი დამცველების სიცოცხლე და უზრუნველყოს მათი გაყვანა მარიუპოლიდან ყველა შესაძლო საშუალებით, მათ შორის მესამე ქვეყანაში ევაკუაციით“ – წერს დენისოვა.

__________________________________

ფოტო: EPA-EFE/ALESSANDRO GUERRA

ამავე თემაზე:

ტყვედ არ ჩაბარდებიან, რუსები მათ მოკლავენ – „აზოვსტალში“ დაჭრილი მებრძოლის ცოლი

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com