ხარკოვში და ხარკოვის ოლქის სოფლებში თანდათან ბრუნდებიან ადგილობრივი მაცხოვრებლები – ამის შესახებ ხარკოვის ოლქის ადმინისტრაციული ხელმძღვანელი, ოლეგ სინეგუბოვი ავრცელებს ინფორმაციას ტელეგრამზე.
მისი განცხადებით, მხოლოდ მატარებლებით ხარკოვში ყოველდღიურად ბრუნდება 2 ათასი ადამიანი.
სინეგუბოვი წერს, რომ ხარკოვში უკვე რამდენიმე დღეა შედარებითი სიჩუმეა, მაგრამ ეს არ ნიშნავს, რომ ქალაქი უსაფრთხოა, რადგან კვლავ არსებობს რუსეთის შეიარაღებული ძალების მხრიდან დაბომბვის საფრთხე. ოლქის ბევრ ადგილას მიმდინარეობს განაღმვითი სამუშაოები.
ამავე დროს, რუსეთის შეიარაღებული ძალები აგრძელებენ დარტყმას ოლქის დასახლებებზე. წუხელ, ჩუჰუივის რაიონში კვლავ განხორციელდა დარტყმა, დაშავდა 2 ადამიანი, მათ შორის 15 წლის ბავშვი. პერვომაისკის დაბომბვისას ასევე დაშავდა ორი ადამიანი – წერს ოლეგ სინეგუბოვი.
ხარკოვი, უკრაინის სიდიდით მეორე ქალაქი, ომის დაწყების პირველივე დღეებიდან იბომბებოდა, მათ შორის გრადის ტიპის რაკეტებით. დაზიანდა და განადგურდა საცხოვრებელი კორპუსები, ქალაქი ომის პირველივე დღეებში ათასობით ადამიანმა დატოვა.
უკრაინის შეიარაღებული ძალები ბოლო დღეებია ხარკოვთან კონტრშეტევაზე გადავიდნენ.
________________
ფოტოზე: ქალაქი ხარკოვი, 14 მაისი. ფოტო: EPA-EFE/SERGEY KOZLOV
ამავე თემაზე:
ჯარისკაცები არა, რუსეთიდან ჩვენთან დაქირავებული მკვლელები მოვიდნენ – ხარკოველი ქალი
