2023 წლის ივლისში საქართველოში 21 წლამდე ნაკრებთა ევროპის ჩემპიონატი იგეგმება ფეხბურთში. ამისათვის სახელმწიფო ბიუჯეტიდან 100 მილიონი ლარი დაიხარჯება.
რეგიონული განვითარებისა და ინფრასტრუქტურის მინისტრის, ირაკლი ქარსელაძის განცხადებით, ჩემპიონატი საქართველოს სამ ქალაქში გაიმართება, რის გამოც, დაგეგმილია სპორტული ინფრასტრუქტურის რეაბილიტაცია.
„ჩემპიონატი უეფას ეგიდით იმართება. ეს არის ყველაზე პრესტიჟული ჩემპიონატი, ფინალიც იქნება საქართველოში, ამიტომ ინფრასტრუქტურაც უნდა იყოს უეფას სტანდარტების.
ბათუმში, წყალტუბოში, საგურამოში, თბილისსა და ქობულეთში უნდა დაიწყოს სპორტული ინფრასტრუქტურის რეაბილიტაცია, 12 ობიექტის სრულად რეაბილიტაციაა დაგეგმილი, რაზეც 100 მილიონი ლარი დაიხარჯება“.
დღეს, 26 აპრილს, თეა წულუკიანს, კულტურისა და სპორტის მინისტრს, ჟურნალისტმა ჰკითხა, თუ რატომ გადაწყდა ბიუჯეტიდან თანხის დახარჯვა ახლა, როცა ქვეყანაში მძიმე ეკონომიკური მდგომარეობაა.
„მე რა ვიცი, თქვენ როგორი ქართველი მამაკაცი ბრძანდებით, რადგან ქართველი მამაკაცების ეროვნულ სპორტად იქცა ფეხბურთის მხარდაჭერა, ამიტომ გამკვირვებია თქვენი კრიტიკული შეკითხვა.
ეს სამთავრობო პროექტია, ჩვენ მოგვიწევს ბევრ მაღალი დონის სპორტულ შეჯიბრებებზე უარის თქმა, თუმცა ვფიქრობ, რომ აუცილებლად უნდა ჩატარდეს „ევრობასკეტი“ და ეს ჩემპიონატი, რომელიც მომავალ წელსაა დაგეგმილი,“ – უპასუხა მას წულუკიანმა.
მისი თქმით, ამ ჩემპიონატების გამო შესაძლოა მომდევნო წლის ბიუჯეტში ლარიც კი აღარ იდოს სპორტის მიმართულებით, თუმცა ჩემპიონატი მაინც უნდა ჩაატარონ.
„ჩვენ ვამბობთ, რომ პრიორიტეტი არის ეს. ვიცით, რომ ეს ძალიან დიდი ფინანსური ტვირთია, ამიტომ რაღაც შეჯიბრებებზე უარს ვამბობთ ამის გამო.“ – თქვა წულუკიანმა.
________________
ფოტო „ბათუმელების“ არქივიდან
