გერმანიის პრეზიდენტი ფრანკ-ვალტერ შტაინმაიერი პუტინისა და ლავროვის წინააღმდეგ ომის დანაშაულებისთვის ტრიბუნალის შექმნას ითხოვს. ამის შესახებ საერთაშორისო მედია წერს გერმანულ გამოცემა „შპიგელზე“ დაყრდნობით.
შტაინმაიერის თქმით, უნდა დაისაჯონ ყველა, ვინც უკრაინაში დანაშაული ჩაიდინა, ვინც ბრძანებებს გასცემდა, და, ასევე, ვისაც ამ დანაშაულზე პოლიტიკური პასუხისმგებლობა ეკისრება.
გერმანიის პრეზიდენტმა ასევე განაცხადა, რომ მისთვის მოულოდნელი იყო კრემლის გადაწყვეტილება უკრაინაში ომის დაწყების შესახებ.
„მე დავინახე ცვლილებები რუსულ პოლიტიკაში, მაგრამ, გულწრფელად რომ ვთქვათ, ვლადიმირ პუტინის რაციონალურობის ნარჩენების იმედი მაინც მქონდა“ – თქვა მან.
უკრაინა რუსეთს გენოციდში ადანაშაულებს. კრემლი აცხადებს, რომ ბრალდებები იმის შესახებ, რომ რუსულმა ძალებმა უკრაინის ქალაქ ბუჩაში მშვიდობიანი მოქალაქეები სიკვდილით დასაჯეს, არასწორია და კადრები გაყალბებულია.
გუშინ, 7 აპრილს, გერმანულმა გამოცემა Der Spiegel-მა გამოაქვეყნა სტატია იმის შესახებ, რომ გერმანულმა დაზვერვამ რუსი სამხედროების რადიოშეტყობინებები დააფიქსირა ბუჩის ხოცვა-ჟლეტის შესახებ, რაც მიუთითებს, რომ ეს არ ყოფილა შემთხვევითი დანაშაულები და „სისასტიკე პუტინის არმიის სტრატეგიის ნაწილია“.
