თურქული სააგენტო „ანადოლუს“ ცნობით, თურქეთმა შავ ზღვაში თევზაობა შეაჩერა უსაფრთხოების მიზნით.
„უსაფრთხოების მიზნით, 26 მარტიდან ბულგარეთსა და კეფკენს შორის არსებულ ტერიტორიაზე, შავი ზღვის წყლებში, ყველა სახის თევზაობა შეჩერებულია ღამით,“ – წერს „ანადოლუ“ თურქეთის სოფლის მეურნეობისა და სატყეო მეურნეობის სამინისტროზე დაყრდნობით.
„სიცოცხლისა და ქონების უსაფრთხოების მიზნით, დღეიდან შემდგომ გაფრთხილებამდე შეჩერებულია ყველა სახის თევზაობა, მათ შორის, მცირე გემებით თევზაობა შებინდებიდან გათენებამდე“, – ნათქვამია თურქეთის სამინისტროს განცხადებაში.
დღეს, 26 მარტს, სტამბოლის ჩრდილოეთით, შავი ზღვის მახლობლად, ნაღმი აღმოაჩინეს. ბოსფორზე რამდენიმე საათით შეჩერდა გემების გადაადგილება. ადგილზე კვლავ მუშაობენ სპეციალისტები.
„კვლევის შედეგად დადგინდა, რომ ეს იყო ძველი სტილის ნაღმი. ამ საკითხზე რუსეთისა და უკრაინის ხელისუფლებასთან მოლაპარაკებები მიმდინარეობს“, – განაცხადა თურქეთის თავდაცვის მინისტრმა ჰულუსი აკარმა.
____________
ფოტო: სააგენტო „ანადოლუ“
