აჭარის უმაღლესი საბჭოს წევრის, გია აბულაძის ინფორმაციით, „ოცნების“ ფრაქციამ უარი თქვა რეზოლუციაზე, რომელიც რუსეთ-უკრაინის ომის დაგმობას და უკრაინისთვის სოლიდარობის ოფიციალურად გამოხატვას ითვალისწინებს. ენმ-ს წევრ გია აბულაძის თქმით, რეზოლუციაზე ხელმოწერა და მისი გამოქვეყნება უმაღლეს საბჭოს ოპოზიციამ შესთავაზა. რეზოლუციის პროექტი – „უკრაინის მხარდაჭერის შესახებ“ – უმაღლეს საბჭოში „ერთიანი ნაციონალური მოძრაობის“ ფრაქციამ 2 კვირის წინ დაარეგისტრირა.
გია აბულაძის ინფორმაციით, უმაღლესი საბჭოს კომიტეტებმა უარყოფითი დასკვნა მოამზადეს.
„ჩვენ ვცდილობდით, რომ მიგვეღო ერთობლივი რეზოლუცია. მათი თქმით, აჭარის უმაღლეს საბჭოს არ აქვს უფლება, რომ სოლიდარობა გამოუცხადოს უკრაინას, ჩვენი კომპეტენცია არ არის საერთაშორისო ურთიერთობებიო. სოლიდარობის გამოხატვის უფლება თუ არა აქვს უმაღლეს საბჭოს, მაშინ რას უნდა აკეთებდეს. გამოვიხუროთ მაშინ უმაღლესი საბჭოს კარები, თუ სოლიდარობის გამოხატვის უფლება არ გვქონია. მივიღოთ 21-ვე დეპუტატმა გადაწყვეტილება, რომ უმაღლესმა საბჭომ აღარ იარსებოს.“
გია აბულაძის ინფორმაციით, „ოცნების“ ფრაქცია ცენტრალურ ოფისში არკვევდა, შეეძლო თუ არა რეზოლუციაზე ხელმოწერა და მისი გამოქვეყნება, თუმცა უარი მიიღო:
„ჩვენ შევთავაზეთ გამოსავალი – მოდით, გადავდოთ სხდომები და იურისტთა ასოციაციას ვთხოვოთ [რეგლამენტი ითვალისწინებს ექსპერტების მოწვევას], ან თქვენ ვისაც შეარჩევთ, რომელიმე კონსტიტუციონალისტი შევიყვანოთ ამ კომისიაში-მეთქი. საიამ მოგვაწოდოს დასკვნა, მიეკუთვნება თუ არა ეს აჭარის უმაღლესი საბჭოს კომპეტენციას-მეთქი. ამაზეც ასევე უარი გვითხრეს“.
გია აბულაძის თქმით, „ქართული ოცნების“ ფრაქციას სურდა ამ რეზოლუციაზე ხელმოწერა, თუმცა ცენტრიდან თანხმობა ვერ მიიღეს: „ჩემი ინფორმაციით, ცდილობდნენ მთავრობა დაერწმუნებინათ, რომ ეს რეზოლუცია უნდა მიგვეღო, წამოსცდათ პარლამენტშიც შევხვდით ვიღაცებს, საგარეო სამინისტროშიც შევხვდით და გავარკვიეთო. ცენტრალურ ხელისუფლებასთან რა უნდოდათ ელემენტარული რეზოლუციის მისაღებად? – სხდომაზეც თქვეს, ყველა უწყებაში ვიყავითო. როგორც ჩანს, ეხვეწებოდნენ, მაგრამ აუკრძალეს.“
უმაღლესი საბჭოს თავმჯდომარის მოადგილის, ტიტე აროშიძის განმარტებით, „ოცნება“ რეზოლუციაში გამოთქმულ პათოსს ეთანხმება და თითოეული დეპუტატი მზადაა ინდივიდუალურად მოაწეროს მას ხელი, თუმცა ეს არ იქნება უმაღესლი საბჭოს მიერ მიღებული დოკუმენტი:
„როგორც წერია იურიდიული დეპარტამენტის მიერ მომზადებულ დასკვნაში, ჩვენ არ გვაქვს კომპეტენცია, რომ მივიღოთ აღნიშნული ტიპის რეზოლუცია. ცალსახად მომხარე ვართ იმისა, რომ რეზოლუციას ხელი მოვაწეროთ ტელევიზიების წინაშე და ერთობლივი განცხადებაც გავაკეთოთ, ოღონდ ეს იქნება ჩვენი, დეპუტატებების, პიროვნული განცხადება და არა უმაღლესი საბჭოს მიერ მიღებული რეზოლუცია. რუსეთი რომ ოკუპანტი და აგრესორია, შეიჭრა უკრაინაში იმისთვის, რომ ოკუპაცია მოეხდინა და სამხედრო აგრესია გაევრცელებინა, ამას ხედავს მთალი მსოფლიო.“ – გვითხრა ტიტე აროშიძემ.
