დღეს, 17 მარტს, გერმანიის ბუნდესტაგში ოცწუთიანი გამოსვლისას უკრაინის პრეზიდენტმა ვოლოდიმირ ზელენსკიმ გერმანიას სთხოვა დახმარება იმ „კედლის“ დანგრევაში, რომელსაც რუსეთი აშენებს დასავლეთ და აღმოსავლეთ ევროპას შორის.
„მოგმართავთ და შეგახსენებთ იმას, რაც საჭიროა, რის გარეშეც ევროპა ვერ გადარჩება, ვერ შეინარჩუნებს თავის ღირებულებებს.
ყოფილმა მსახიობმა და ამერიკის შეერთებული შტატების პრეზიდენტმა, რონალდ რეიგანმა, ერთხელ ბერლინში თქვა: „დაანგრიეთ ეს კედელი!“ ახლა მინდა გითხრათ: კანცლერო შოლც, დაანგრიეთ ეს კედელი! მიეცით გერმანიას ლიდერის როლი, რომელსაც იმსახურებთ და რითაც თქვენი შთამომავლები მხოლოდ იამაყებენ. მხარი დაგვიჭირეთ! მხარი დაუჭირეთ მშვიდობას! მხარი დაუჭირეთ თითოეულ უკრაინელს! შეაჩერეთ ომი! დაგვეხმარეთ ჩვენ მის შეჩერებაში!“ – თქვა ზელენსკიმ.
ვოლოდიმირ ზელენსკიმ სიტყვით გამოსვლისას გერმანიას პასიურობის გამო უსაყვედურა:
„როდესაც ჩვენ ვითხოვეთ პრევენციული სანქციები, ჩვენ მივმართეთ ევროპას, ჩვენ მოგმართეთ თქვენ: სანქციები (აუცილებელია) ისეთი, რომ აგრესორმა იგრძნოს, რომ თქვენ ძალა ხართ. ჩვენ დავინახეთ პროცესის გაწელვა. ვიგრძენით წინააღმდეგობა, მივხვდით, რომ თქვენ გსურთ გააგრძელოთ ეკონომიკა… ახლა კი სავაჭრო მარშრუტები თქვენსა და სახელმწიფოს შორის, რომელმაც კვლავ მოიტანა სასტიკი ომი ევროპაში, მავთულხლართებია კედელზე, ახალ კედელზე, რომელიც ყოფს ევროპას და თქვენ ვერ ხედავთ რა არის ამ კედლის მიღმა. ის ჩვენს შორის, ევროპაში ხალხებს შორის არის“, – აღნიშნა ზელენსკიმ.
მისი თქმით, გერმანია ახლაც აჭიანურებს უკრაინის ევროკავშირში გაწევრიანების საკითხს.
„ჩვენი სიცოცხლის მანძილზე, ჩვენი თავისუფლებისთვის მომხდარი სამი ომის განმავლობაში, ჩვენ დავრწმუნდით იმაში, რასაც ადრე ვგრძნობდით და რასაც, ალბათ, ყველა თქვენგანი ჯერ ვერ ამჩნევთ, მაგრამ თქვენ თითქოს ისევ კედლის მიღმა ხართ. დიახ, ეს არ არის ბერლინის კედელი – ეს არის კედელი ცენტრალურ ევროპაში თავისუფლებასა და მონობას შორის და ეს კედელი იზრდება ყოველი ბომბით, რომელიც ეცემა ჩვენს მიწაზე, უკრაინაში“, – უთხრა ზელენსკიმ ბუნდესტაგის დეპუტატებს.
