2 აპრილს ბათუმში შუალედური არჩევნები გაიმართება. #4 მაჟორიტარული ოლქის ამომრჩეველი საკრებულოში თავის წარმომადგენელს აირჩევს. ამ ოლქში ხელახალი არჩევნების გამართვა დღის წესრიგში საკრებულოს არჩეული წევრის, ნუგზარ ფუტკარაძის გარდაცვალების შემდეგ დადგა.
ნუგზარ ფუტკარაძე ახალარჩეული საკრებულოს შეკრებამდე გარდაიცვალა. მისი გარდაცვალებიდან რამდენიმე დღეში „ერთიანმა ნაციონალურმა მოძრაობამ“ განაცხადა, რომ ნუგზარ ფუტკარაძეს აშანტაჟებდნენ, ამის დამადასტურებელი აუდიოჩანაწერი გაავრცელა და საქმის სწრაფად გამოძიება მოითხოვა.
ბათუმის #4 მაჟორიტარულ ოქლში 20 202 ამომრჩეველია რეგისტრირებული [10 589 ქალი და 9613 კაცი]. შუალედურ არჩევნებზე ბათუმში 14 საარჩევნო უბანი გაიხსნება. არჩევნებში მხოლოდ ორი კანდიდატი მონაწილეობს – „ერთიანი ნაციონალური მოძრაობიდან“ მათე ფუტკარაძე, ის საკრებულოს გარდაცვლილი წევრის, ნუგზარ ფუტკარაძის შვილია და „ქართული ოცნებიდან“ რამაზ ჯინჭარაძე, აჭარის ჯანდაცვის მინისტრის მოადგილე.
2021 წლის 2 ოქტომბრის თვითმმართველობის არჩევნების პირველ ტურში ბათუმის #4 საარჩევნო მაჟორიტარულ ოლქში რეგისტრირებული 20 138 ამომრჩევლიდან არჩევნებზე 11 535 ამომრჩეველი მივიდა. მათგან 4838-მა ამომრჩეველმა ხმა მისცა ნუგზარ ფუტკარაძეს [ენმ], 4542-მა მამუკა კაკაბაძეს [„ოცნება“], 1481-მა კი – მინდია დევაძეს, „გახარია საქართველოსთვის“. ამჯერად გახარიას პარტიამ შუალედურ არჩევნებში თავისი კანდიდატი არ დააყენა.
