პლატფორმა „მეტა“, რომელიც მოიცავს სოციალურ ქსელებს ფეისბუქსა და ინსტაგრამს დროებით დასაშვებს ხდის სიძულვილის ენის გამოყენებას რუსი სამხედროების, პუტინის და ბელორუსის პრეზიდენტის ლუკაშენკოს მისამართით.
ამ ინფორმაციას როიტერსი, სოციალური ქსელის მოდერატორების შიდა მიმოწერაზე დაყრდნობით ავრცელებს.
როიტერსი წერს, რომ უკრაინაში რუსეთის შეჭრის შემდეგ „მეტა“ დროებით უშვებს პოლიტიკური შეხედულებების გამოხატვის ისეთ ფორმებს, რომელიც ჩვეულებრივ არღვევს წესებს. მაგალითად, დასაშვები ხდება ისეთი გამონათქვამი, როგორიცაა „სიკვდილი რუს დამპყრობლებს“. თუმცა „მეტა“ არ უშვებს ძალადობის ენას რუსი მშვიდობიანი მოქალაქეების მიმართ.
ცვლილება ეხება უკრაინას, საქართველოს, სლოვაკეთს, ლიეტუვას, სომხეთს, აზერბაიჯანს, რუსეთს, ლატვიას, ესტონეთს, უნგრეთს, პოლონეთსა და რუმინეთს.
„მეტა“ ასევე დასაშვებს ხდის სოციალურ ქსელში მოქალაქეებმა გააკეთონ მოწოდებები და სიკვდილი უსურვონ რუსეთის პრეზიდენტ ვლადიმერ პუტინს და ბელორუსის პრეზიდენტ ალექსანდრე ლუკაშენკოს.
“მეტას” ახალ წესებს უკვე გამოეხმაურა რუსეთის საელჩო ამერიკის შეერთებულ შტატებში, რომელმაც აშშ-ს ხელისუფლებას სოციალური ქსელის მფლობელი კომპანიის “ექსტრემისტული საქმიანობის” აღკვეთა სთხოვა.
