46 წლის თეა შენგელია ქალაქ მარტვილში, მშვიდობის ქუჩაზე ცხოვრობს. თეა უკრაინიდან დევნილ მოქალაქეებს საკუთარ საცხოვრებელ სახლს სთავაზობს. თეა ამბობს, რომ ამ ეტაპზე 15-20 ადამიანის მიღება შეუძლია. მისი თქმით, უკრაინელ დევნილებს მანამდე შეუძლიათ მის სახლში ცხოვრება, სანამ თვითონ არ გადაწყვეტენ წასვლას.
„დიდი სახლი მაქვს, სადაც ძირითადად ჩემი მეათეკლასელი შვილი და დედა ცხოვრობს. მე და ჩემი მეუღლე ექვსი წელია თურქეთში ვართ და ხშირად ვართ იქეთ, ახლაც თურქეთში ვაპირებთ გამგზავრებას.
გერასუნის რაიონში დიდი სახლი და სოფლის მეურნეობა გვაქვს. გვყავს მწყერი, ცხვარი და საქონელი. თხილის ბაღებიც გვაქვს. ასე, რომ ლტოლვილების მიღება თურქეთშიც შეგვიძლია, თუკი ისურვებენ.
უკრაინელ ხალხს ძალიან ვგულშემატკივრობთ მთელი ოჯახი, მათი მხარდამჭერი აქციებიც გვქონდა თურქეთში“, – გვეუბნება თეა შენგელია.
თეა, ისევე როგორც საქართველოს მოსახლეობის უმეტესობა მიიჩნევს, რომ უკრაინაში საქართველოსთვისაც იბრძვიან და უკრაინის გამარჯვება საქართველოს გამარჯვებაცაა.
„თუ უკრაინა აიღო, ხვალ-ზეგ რომ ჩვენ მოგვადგებიან სახლში, ეს გარანტირებულია. საქართველოს მთავრობა კი ვხედავთ რასაც აკეთებს. უკრაინაა ახლა მთავარი, თორემ საქართველო უკვე აღებულიც აქვს, ჩვენ ვერ ვგრძნობთ თორემ, ამათ უკვე ჩაბარებული აქვთ საქართველო“, – ამბობს თეა.
მისი თქმით, ახლა უკრაინის მხარდაჭერა ყველაზე მნიშვნელოვანია, რადგან მან ამ ომში უნდა გაიმარჯვოს.
