„მიმდინარეობს სამუშაო შეხვედრები“, – გვიპასუხეს ბათუმის მერიის პრესცენტრში, სადაც დღეს, 9 მარტს, ვიკითხეთ: რა გადაწყვიტა მერიამ ბათუმის სანაპირო ზოლის ნაპირგამაგრების კუთხით?
გუშინ, 8 მარტს, ბათუმის ახალ ბულვარში პრომინადის ნაწილი ისევ ჩავარდა და ტრაქტორიც ჩაიყოლა. ამ ტრაქტორით ზღვაში შემავალი სანიაღვრე არხის გაწმენდას გეგმავდა „ბათუმის წყალი“.
პრომინადის ნაწილი წაიღო და პლაჟის ინფრასტრუქტურა დააზიანა ზღვამ შტორმის დროს, 7 თებერვალს. იმ დღეს ბათუმის მერმა, არჩილ ჩიქოვანმა თქვა, რომ ექსპერტებთან ერთად სწავლობენ სანაპირო ზოლს და გადაწყდება, როგორ უნდა აღადგინონ-გაამაგრონ სანაპირო.
მიუხედავად იმისა, რომ ამ განაცხადებიდან ერთ თვეზე მეტი დრო გავიდა და პრომინადის ჩამოშლის პროცესი გრძელდება, ამ დრომდე ბათუმის მერიაში გადაწყვეტილება არ მიუღიათ.
ბათუმის მერიის პრესცენტრის ინფორმაციით, ამ პროცესში ჩართულნი არიან საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის, ასევე გარემოს ეროვნული სააგენტოს და აჭარის მთავრობის წარმომადგენლები. აქ ვერ გვითხრეს ამ „სამუშაო შეხვედრებში“ რას განიხილავენ და რატომ ვერ მოხერხდა ამ დრომდე გადაწყვეტილების მიღება.
სპეციალისტების თქმით კი, აუცილებელია ზღვის ხელოვნური კვება, ინერტული მასალის კონკრეტულ ადგილებზე შეტანა იმისთვის, რომ ზღვისგან ნაპირის მიტაცების პროცესი შეწყდეს. მაგალითად, გეოლოგი ტარიელ ტუსკია ამბობს, რომ 2009 წელს, როცა ნაპირის გამაგრება ხელოვნურად სცადეს, ამან კონკრეტული შედეგი გამოიღო.
