ნეტგაზეთი • RU

შიში, რომელსაც პრემიერის ხმაში ვხედავთ, კატეგორიულად მიუღებელია – კორძაია

დღეს, პირველ მარტს, საქართველოს პარლამენტში გამოსვლისას დამოუკიდებელმა დეპუტატმა თამარ კორძაიამ ირაკლი ღარიბაშვილი გააკრიტიკა. მან ასევე გაიხსენა როგორ გახდა აფხაზეთიდან დევნილი, რაშიც რუსეთს მიუძღვის წვლილი.

„მე თამარ კორძაია, საქართველოს პარლამენტის წევრი, წარმოშობით ვარ აფხაზეთიდან. 16 წლის ვიყავი, როდესაც გადმოვედით მთებით ფეხით. დღეს ვარ 44 წლის. ამ ხნის მანძილზე მე ისევ მახსოვს გზაზე გაყინული ბავშვები, დაჭრილი ჯარისკაცები, გზაში გარდაცვლილები. ორი ღამე ღია ცის ქვეშ გათენებული. ეს არ მავიწყდება.

სიბრაზე ყველა ხელისუფლების მიმართ შეიძლება დაგავიწყდეს, ყველა ხელისუფლების ლიდერის სიტყვა შეიძლება დაგავიწყდეს, მაგრამ ის სიმწარე, რომელსაც საკუთარ ცხოვრებაში, საკუთარი თვალით ნახავ და იგრძნობ, არ დაგავიწყდება და არ დაგავიწყდება, რომ ეს გააკეთა რუსეთმა“, – ამბობს თამარ კორძაია.

მისი თქმით, დღეს, 2022 წელს, პუტინი და რუსეთი ისევ ჩადის კაცობრიობის წინაშე წარმოუდგენელ დანაშაულს. „ისევ ხოცავს ბავშვებს, ქალებს და მშვიდობიან მოსახლეობას, იმიტომ, რომ ვიღაცებს ეშინიათ, ვიღაცები თვლიან, რომ ეს ჩვენ არ უნდა შეგვეხოს, რომ გონივრული პოლიტიკაა თურმე ის, რომ რახან უკრაინას დაარტყა და საქართველოს არ ურტყამს, ჩვენ შეგვიძლია ჩუმად ვიყოთ.

ის შიში, რომელსაც ჩვენ დღეს პრემიერის ტექსტში ვხედავთ, მიუხედავად მისი ხმამაღალი საუბრისა, კატეგორიულად მიუღებელია.

საქართველოს პრეზიდენტიც თქვენი არჩეულია, რომელმაც თქვა გარკვევით, რომ ჩვენგან ელიან სოლიდარობას. რატომღაც ის სხვა სიტყვებით ლაპარაკობს და სხვა ტექსტებით გამოხატავს ამ მზაობას.

ჩვენ მხოლოდ საქართველოს მოქალაქეების ინტერესებს დავიცავთო, ამბობს პრემიერი, ჩვენ არ უნდა ვიყოთ ისეთი პატარები, რომ მხოლოდ საკუთარ ინტერესებზე ვისაუბროთ. ცოტა მეტი უნდა გავაკეთოთ. ჩვენ უნდა ვიფიქროთ უკრაინელებზე, რომელზეც გადის არა მხოლოდ ჩვენი მშვიდობა და ევროპული უსაფრთხოება და არა იმაზე რამდენი ფული შემოდის რუსეთიდან. რუსეთს გადაუკეტეს ყველაფერი და პრემიერმა არ იცის, რომ რუსეთიდან ეს ფული აღარ შემოვა“, – ამბობს თამარ კორძაია.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com