ნეტგაზეთი • RU

“შეიარაღებული ძალები მძიმე ბრძოლაში არიან, მაგრამ იბრძვიან” – ზელენსკის შტაბი

„შეიარაღებული ძალები მძიმე ბრძოლაში არიან, მაგრამ იბრძვიან. უკვე ბევრი შედეგი გვაქვს. ზოგიერთ რაიონში რუსეთის შეიარაღებულმა ძალებმა უკან დაიხიეს. შეიარაღებული ძალები მზად იყვნენ რუსეთის ყველა სცენარის/გეგმისთვის და ახლა აქტიურ წინააღმდეგობას უწევენ. ეს წინააღმდეგობა გაიზრდება“, – განაცხადა ცოტა ხნის წინ უკრაინის პრეზიდენტის ადმინისტრაციის პრესცენტრში გამართულ ბრიფინგზე პრეზიდენტის შტაბის უფროსის მრჩეველმა მიხაილო პოდოლიაკმა.

მიხაილო პოდოლიაკმა ასევე მოუწოდა მედიას, ყურადღებით გადაამოწმონ ის ინფორმაცია, რასაც აქვეყნებენ ან გადასცემენ ეთერში.

„რადგან დღემდე არავის გაუუქმებია რუსეთის მიერ უკრაინის წინააღმდეგ წარმოებული საინფორმაციო ომი. სამწუხაროდ, ზოგიერთი უკრაინული მედია აქვეყნებს რუსეთის ფედერაციის პროპაგანდისტულ მასალებს“, – განაცხადა მან.

უკრაინის თავდაცვის სამინისტროს ინფორმაციით, პრეზიდენტის აპარატის უფროსის მრჩეველმა ალექსეი არესტოვიჩმა აღნიშნა, რომ წინასწარი შეფასებით, რუსეთის პირველი დარტყმა ჩაიშალა.

„რაც შეეხება ქალაქებს, გეოგრაფიას – ეს არის ივანო-ფრანკოვსკი, ხმელნიცკი, ჩერნიგოვი, ხარკოვი, კიევი, ოდესა, მიკოლაევი, ხერსონი, კრამატორსკი და უშუალოდ ერთობლივი ძალების ოპერაციის ჩატარების ზონის ხაზის გასწვრივ”, – თქვა მან.

პრეზიდენტის აპარატის უფროსის მრჩევლის თქმით, უკრაინული მხარის დანაკარგებმა არ შეამცირა შეიარაღებული ძალების და სხვა ძალოვანი სტრუქტურების საბრძოლო ეფექტურობა.

__

მთავარი ფოტო: ვოლოდიმირ ზელენსკი

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან