„დემოკრატიის კვლევის ინსტიტუტი“ დიზაინერ გიორგი მასხულიას ცემის ფაქტს ეხმაურება და აცხადებს, რომ კატეგორიულად მიუღებელია სოციალურ ქსელში სიძულვილის ენა და ჰომოფობიური შინაარსის კომენტარები.
„მედიასაშუალებებით გავრცელებული ინფორმაციის თანახმად, ამ დრომდე არც ერთი თავდამსხმელი არ არის დაკავებული. მომხდარ ფაქტზე გამოძიება საქართველოს სისხლის სამართლის კოდექსის 126-ე (ძალადობის) მუხლის საფუძველზე მიმდინარეობს.
დანაშაულის მოტივის შესაფასებლად, დეტალურად უნდა გაანალიზდეს საქმის ფაქტობრივი გარემოებები და სისხლის სამართლებრივი პასუხისმგებლობა შესაბამისად განისაზღვროს. აღსანიშნავია, რომ საქმეში შერეული მოტივების (ორი ან ორზე მეტი) არსებობა, არ გამორიცხავს სიძულვილის მოტივის არსებობასაც.
გასათვალისწინებელია, რომ დანაშაული სიძულვილით მოტივირებულად მიიჩნევა მაშინაც, როდესაც დამნაშავის მიერ დაზარალებულის შერჩევა წინასწარგანწყობისა და შეუწყნარებლობის გამო ხდება.
დემოკრატიის კვლევის ინსტიტუტი გმობს დიზაინერ გიორგი მასხულიას მიმართ ჩადენილ სასტიკ ძალადობას და კატეგორიულად მიუღებლად მიაჩნია სოციალურ ქსელებში დაზარალებულის ბულინგი, სიძულვილის ენა და ჰომოფობიური/ტრანსფობიური შინაარსის კომენტარები“, – აცხადებს ორგანიზაცია.
გიორგი მასხულიას განცხადებით, მას 21 თებერვალს, გვიან ღამით, თბილისში, კლუბ „ოთახში“ 3 პირი თავს დაესხა. გიორგი მასხულია მისივე გავრცელებულ ვიდეოკადრში აცხადებს, რომ მოძალადეები „მავანისგან“ იყვნენ. დაზარალებულის მეგობრის გიორგი არუთინაშვილის თქმით კი, ძალადობის მოტივი შესაძლოა მისი „ეპატაჟურობა“ ყოფილიყო.
„დემოკრატიის კვლევის ინსტიტუტი“ მოუწოდებს საქართველოს პროკურატურასა და შინაგან საქმეთა სამინისტროს, რომ გიორგი მასხულიას მიენიჭოს დაზარალებულის სტატუსი, ბრალის წარდგენისას გაითვალისწინონ შესაძლო სიძულვილის მოტივი, გამოძიება წარმართონ ეფექტიანად და მიუკერძოებლად.
